Фота Паўла Міцкевіча
Салоны лайнераў расійскага «Аэрафлота» аформілі ў стылі вышыванак. Сурвэткі, пакуначкі з цукрам, падушкі на сядзеннях бізнэс-класа — на ўсё гэта нанесены нацыянальны арнамент, піша kp.by
Спачатку можа падацца, што вышыванка — беларуская. Менавіта такое спалучэнне старажытных сімвалаў ўжо даўно прывыклі бачыць у афармленні розных аб'ектаў беларусы. Аднак па словах спецыялістаў, канкрэтна гэты ўзор выкарыстоўваўся на тэрыторыях як сучаснай Беларусі, так і Расіі.
— Некарэктна казаць, што гэта чыста беларуская вышыванка. І ў беларусаў, і ў рускіх такі арнамент існаваў, — адказаў kp.by загадчык філіяла Веткаўскага музея стараверства і беларускіх традыцый імя Шклярава Пётр Цалко.
Бортправаднікі растлумачылі, што з такім рэбрэндынгам лайнеры «Аэрафлота» лётаюць ўжо не першы месяц, аднак пра паходжанне вышыванкі нічога не ведаюць.
Нагадаем, яшчэ ў 2016 годзе нацыянальны перавозчык «Белавія» адзеў свае самалёты ў вышыванку.