Былы санітар Нільс Хёгель, які адбывае пажыццёвае зняволенне за забойства шасці чалавек, зноў трапіў на лаву падсудных. Цяпер яго абвінавачваюць у забойстве яшчэ 100 пацыентаў, паведамляе DW.
Былы санітар Нільс Хёгель (Niels Högel), які абвінавачваецца ў забойстве 100 чалавек, прызнаўся ў гэтых злачынствах. У першы ж дзень судовага працэсу па ягонай справе, які пачаўся ў аўторак, 30 кастрычніка, у ніжнесаксонскім горадзе Ольдэнбург, на пытанне суддзі, ці абгрунтаваныя абвінавачванні супраць яго, Хёгель адказаў: «Так».
41-гадовы падсудны, які ўжо асуджаны да пажыццёвага зняволення за шэсць забойстваў, цяпер абвінавачваецца ў яшчэ 100 выпадках забойстваў, учыненых у 2000-2005 гадах. Паводле абвінавачання, санітар, які працаваў у дзвюх клініках — у Ольдэнбурзе і Дэльменхорсце, рабіў хворым ва ўзросце ад 34 да 96 гадоў уколы, уводзячы медыкаменты, што прыводзіла да іх смерці. Пасля гэтага Хёгель спрабаваў рэанімаваць пацыентаў, аднак зрабіць гэта яму часта не ўдавалася.
