На 81-м годзе жыцця памёр кампазітар Ігар Лучанок.
фота oo-spb.by
«Спадчына», «Мой родны кут», «Жураўлі на Палессе ляцяць» — песні, музыку для якіх стварыў Ігар Лучанок, часта ўспрымаюцца як народныя.
Ігар Лучанок нарадзіўся ў 1938 у Мінску ў сям'і доктара, але пражыў у сталіцы ўсяго першыя тры месяцы жыцця, пасля бацьку перавялі на працу ў Мар'іну Горку.
У Мінск сям'я вярнулася толькі пасля вайны, тут Лучанок вучыўся ў музычнай школе пры Беларускай дзяржаўнай кансерваторыі, яго першым інструментам былі цымбалы. У студэнцкія часы яго настаўнікамі ў кампазітарскім майстэрстве былі Анатоль Багатыроў і Ціхан Хрэннікаў.
Лучанок 35 гадоў узначальваў Беларускі саюз кампазітараў. «Мяне яшчэ Машэраў прызначыў», — казаў ён.