У Кіеве на аўтавакзале кіроўца аўтобуса разбіў камеру аператара і фатографа Беларускага Свабоднага тэатра Мікалая Купрыча. Таксама кіроўца пабіў Купрыча і пашкодзіў яго галаву, паведамляе мастацкі кіраўнік тэатра Мікалай Халезін.
На працягу ўсяго візіту ў Кіеве Мікалай Купрыч здымаў матэрыял для фільма, які рыхтуе тэатр.
Халезін сцвярджае, што, калі Купрыч прыйшоў на рэйсавы аўтобус Ecolines, які ехаў у Мінск, кіроўца, убачыўшы камеру, якая вісіць на яго плячы, сказаў, што ў аўтобус Купрыча не пусціць. Па словах Халезіна на пытанне «чаму?», кіроўца проста парваў білет.
Праверыць гэтыя сцвярджэнні ў нас няма магчымасці, бо сведкаў і відэазапісу няма.
Аператар уключыў камеру і стаў здымаць кіроўцу. У адказ кіроўца ударыў камеру, а пасля і аператара. Людзі, якія стаялі каля аўтобуса, у канфлікт не ўмешваліся.
Пасля гэтага аўтобус з'ехаў, а Купрыч выклікаў паліцыю, а затым напісаў заяву.
