Напачатку лістапада ў Ашмянах адбылася трагедыя — застрэліўся малады пагранічнік, 23-гадовы Фёдар Б.
Як кажуць сябры хлопца, прычынай стала няўдалае каханне.
Фёдар быў мясцовым хлопцам, адслужыў тэрміновую ў пагранічніках і потым застаўся на кантракт.
У Ашмянах у яго была маладзейшая дзяўчына Ангеліна Р. — толькі сёлета яна скончыла школу.
У Ашмянах не было дзе атрымаць вышэйшую адукацыю, таму дзяўчына паступіла ва ўніверсітэт у Баранавічы.
Праз адлегласць і змену парадку жыцця пара разышлася.
Неўзабаве ў дзяўчыны з'явіўся новы хлопец, а вось Фёдар загаіць сардэчныя раны не здолеў і застрэліўся.
Апошнім рэверансам у бок былога кахання стаў допіс УКантакце:
«Нехта не даражыў стасункамі з вамі, а цяпер плача, гледзячы на вашыя фота».
Пытанні да ідэолагаў выклікае не толькі празяванае самазабойства, але і агульны змест старонкі хлопца УКантакце: як можна адначасова служыць закону і захапляцца расійскімі крымінальнымі аўтарытэтамі?
