05.12.2018 / 16:33

Былы павераны Польшчы ў Беларусі раскрытыкаваў экс-міністра Сікорскага, які ў сваёй кнізе назваў яго агентам спецслужбаў 1

Былы кіраўнік МЗС Польшчы Радаслаў Сікорскі ў сваёй кнізе «Польшча можа быць лепшай» назваў былога паверанага ў пасольстве Польшчы ў Мінску Вітальда Юраша «прафесійным шпіёнам». Сам Юраш на партале Onet.pl адрэагаваў на гэтае сцверджанне былога міністра вялікім артыкулам.

Вітальд Юраш

Вітальд Юраш піша, што калі б гэта было праўдай, то ён бы не саромеўся гэтага, аднак ухіляецца ад адказу на пытанне, ці быў ён агентам польскіх спецслужбаў.

«Праблема заключаецца ў тым, што факт працы ці супрацоўніцтва з выведкай падпадае пад дзяржаўную тайну з найвышэйшай класіфікацыяй — цалкам сакрэтна. Гаворачы аб тым, што я займаўся «шпіёнскай дзейнасцю», міністр Сікорскі альбо напісаў няпраўду, альбо раскрыў дзяржаўную таямніцу, што з'яўляецца злачынствам»,

— піша Юраш.

Юраш працаваў, як ён піша, у дыппрадстаўніцтвах «ў краіне, якая лічыцца найбольшай пагрозай нацыянальнай бяспецы Польшчы, і краіне, якая сама лічыць Польшчу найбольшай небяспекай сабе». Маюцца на ўвазе Расія і Беларусь. У Мінску ў перыяд беспаслоўя Юраш нейкі час выконваў функцыі часовага паверанага ў справах Польшчы, г.зн. падмяняў пасла.

Юраш называе мемуары Сікорскага безадказнымі, бо, на ягоную думку, яны могуць паставіць пад удар людзей, якія кантактавалі з ім у Маскве і Мінску. Юраш адзначае актыўную працу расійскай і беларускай контрразведак.

Юраш, сярод іншага, апісвае тыповыя паводзіны дыпламатаў, якія адначасова працуюць на спецслужбы. Пасля звычайнай сустрэчы двух такіх дыпламатаў за абедам у іх дзяржавы ляцяць дзве шыфроўкі, піша ён: адна ў замежнапалітычнае ведамства — пра факты, якія ён пачуў у часе гутаркі, і другая — у разведку, з характарыстыкай таго персанажа, з якім ён абедаў. І тое самае з другога боку. 

Юраш узгадвае пра некаторыя сакрэтныя аперацыі польскай дыпламатыі ў Лівіі, дзе ягоны бацька быў паслом, — там палякі пры канцы 2000-х удзельнічалі ў гульнях Захаду з рэжымам Кадафі з мэтай пераканаць яго адмовіцца ад хімічнай зброі. А таксама ў Іраку — прычым польскія дыпламаты, якія там працавалі, дзіўным чынам усе загінулі неўзабаве.

nn.by

0
Максим Дизайнер / Адказаць
06.12.2018 / 12:05
Каддафи, химичная зброя, рукалицо.
Каб пакінуць каментар, калі ласка, актывуйце JavaScript у наладах свайго браўзеру