Праваслаўныя вернікі Беларусі ня маюць права браць удзел у таінствах новаўтворанай Праваслаўнай царквы Ўкраіны. Пра гэта ў інтэрвію карэспандэнту Свабоды заявіў афіцыйны прадстаўнік Беларускай праваслаўнай царквы Сергій Лепін.
Таксама айцец Сергій сказаў, што беларускія праваслаўныя «ня могуць браць удзелу» у набажэнствах ПЦУ.
15 сьнежня на аб’яднаўчым саборы ў Кіеве выбралі галаву адзінай Украінскай памеснай праваслаўнай царквы — Эпіфанія. Ён быў мітрапалітам Пераяслаўскім і Белацаркоўскім, рэктарам Кіеўскай праваслаўнай багаслоўскай акадэміі.
Паводле айца Сергія Лепіна, Беларуская праваслаўная царква ставіцца да ўтварэньня Праваслаўнай царквы Ўкраіны гэтаксама, як і Расейская праваслаўная царква.
«Як да пэўных вонкавых падзей, якія ня маюць дачыненьня непасрэдна да жыцьця кананічнай Праваслаўнай царквы».
Таксама, паводле айца Сергія Лепіна, кіраўніцтва БПЦ не накіроўвала віншаваньня першаярарху Праваслаўнай царквы Ўкраіны мітрапаліту Кіеўскаму і ўсяе Ўкраіны Эпіфанію.
Ці будуць падтрымлівацца кантакты паміж БПЦ і ПЦУ?
«Якія кантакты? Звычайныя добрасуседзкія кантакты. Мы не шукаем вайны, варожасьці. Мы сябры для ўсіх. Дружба дружбай, але пэўныя пытаньні ўсё ж асобна. Ні пра якія кананічныя, літургічныя стасункі размова не ідзе. Яны нават немагчымыя з гэтай царквой».
Паводле айца Сергія Лепіна, «кантакты магчымыя толькі ў агульнаграмадзянскай пэрспэктыве». Што гэта азначае?
«Гэта азначае, што мы ня ставімся да іх як да царквы-сястры. А мы ставімся да іх як да прадстаўнікоў, мабыць, іншай канфэсіі. Гэтаксама, як да каталікоў, уніятаў ці як да якіх-небудзь раскольнікаў», — сказаў прадстаўнік БПЦ.
