Фота з фэйсбука
Вядоўца ўкраінскага камедыйнага шоу «Вячэрні квартал» Уладзімір Зяленскі распавёў, ці плануе ён балатавацца ў прэзідэнты на найбліжэйшых выбарах. Пра гэта ён заявіў у інтэрв'ю выданню «Гардон».
«Схіляюся. (…) Думаю, можа быць, так. Я пра гэта вельмі сур'ёзна думаю і шмат размаўляю з сям'ёй », - заявіў акцёр, падкрэсліўшы, што пра гэта яшчэ рана казаць. Зяленскі афіцыйна не заяўляў пра намер вылучаць сваю кандыдатуру на пасаду кіраўніка дзяржавы. Тым не менш, яго рэйтынг — адзін з самых высокіх.
Разважаючы пра магчымую канкурэнцыю на выбарах, ён выказаў здагадку, што Пятро Парашэнка можа ўвайсці ў тройку лідараў, бо ён «чалавек учэпісты». Ён таксама выказаў надзею, што для ўзняцця рэйтынгу ўкраінскі лідэр абярэ крэатыўны, але мірны метад. «Толькі б не з вайной звязанае», - сказаў ён.
Згодна з вынікамі апытання, Парашэнка займае толькі трэці радок у рэйтынгу магчымых кандыдатаў на будучых прэзідэнцкіх выбарах - яго гатовыя падтрымаць 8,6% ад агульнай колькасці апытаных. Лідарам рэйтынгу з'яўляецца Юлія Цімашэнка, свой голас за яе гатовыя аддаць 14,2 адсотка ўсіх рэспандэнтаў. Зяленскі займае другое месца з 9 працэнтамі ад агульнага ліку апытаных.
Прэзідэнцкія выбары ва Украіне пройдуць 31 сакавіка 2019 года.
