Міхаіл Дзегцяроў (злева) і Уладзімір Жырыноўскі ў лазні. Фота gazeta.ru.
Імя 37-гадовага дэпутата Дзяржаўнай Думы Расіі Міхаіла Дзегцярова нечакана стала вядомым у Беларусі. Справа ў тым, што гэты палітык прапанаваў нашай краіне далучыцца да Расіі па крымскім сцэнары. Мабыць, шмат у каго гэта на розуме, а вось у Дзегцярова і на языку.
«Цалкам магчыма, што народ хоча ўз'яднання з Расіяй. Чаму б не даць такое права — выказацца? Зрабіць саюзную дзяржаву не на прынцыпах, якія не працуюць 20 гадоў, а на іншых прынцыпах. Спытаць народ, як вы хочаце жыць з Расіяй у саюзнай дзяржаве? Можа, народ хоча ўз'яднацца, як крымчане? Трэба спытаць беларусаў. Такое пытанне, якое трэба рашыць», — сказаў Дзегцяроў у інтэрв’ю тэлеканалу «Дождь».
Што ж за фрукт гэты Дзегцяроў? Родам ён з Самары, а дэпутатам Дзяржаўнай Думы з’яўляецца ўжо два скліканні. Узначальвае ў Думе камітэт па фізічнай культуры, спорце і справах моладзі.
Ягоныя бацькі — лекары. У пачатку 90-х выязджалі на заробкі ва Уганду і Емен. Таму Міхаіла пакідалі з дзядулем і бабуляй. Дзядуля быў таксама няпростым — другім сакратаром Ульянаўскага абкама КПСС.
Міхаіл Дзегцяроў скончыў Самарскі аэракасмічны ўніверсітэт. Ад 2005 года сябра ЛДПР Жырыноўскага. Знаходзіцца ў кадравым рэзерве прэзідэнта Расіі. Двойчы вылучаўся на мэра Масквы, яго актыўна падтрымліваў лідар партыі Жырыноўскі, але абодва разы з трэскам праваліваўся.
Як палітык адзначыўся заявамі пра забарону ў Расіі амерыканскага даляра. «Я ратую расійскую эканоміку», — так пракаментаваў ён свае заявы. Ён нават уносіў законапраект у Дзярждуму. Праўда, іншыя дэпутаты яго не падтрымалі. Дзегцяроў прадказваў, што эканоміка ЗША лопне ў 2017 годзе.
У 2013-м Дзегцяроў таксама ўнёс у Думу законапраект, які б дазваляў жанчынам не хадзіць два дні на месяц на працу з прычыны «крытычных дзён». «Менструацыя — гэта не толькі медыцынская, але і сацыяльная праблема», — казаў дэпутат.
Што яшчэ арыгінальнага прапаноўваў дэпутат Дзегцяроў? Напрыклад, забараніць гомасэксуалам здаваць кроў. Потым яму стала страшна, што Санта-Клаус можа выціснуць з Расіі Дзеда Мароза, таму прапаноўваў заканадаўча замацаваць за Дзядулем чырвоны нос і Снягурку. Не смейцеся, гэта ўсё было насамрэч.
«Санта-Клаус падрывае наш культурны суверэнітэт і суверэнітэт духу», — упэўнена казаў дэпутат. Таму Санта-Клауса проста трэба забараніць на тэрыторыі Расіі.
Дзегцяроў звяртаўся ў Акадэмію навук Расіі, каб яму дазволілі выкарыстоўваць тэрмін «Маларосія» ў афіцыйных дакументах, а не толькі Украіна. Выступаў ён і за вяртання імперскага чорна-жоўта-белага сцяга Расіі замест сучаснага.
Можна смела казаць, што часта Дзегцяроў гаворыць абы гаварыць, хаця для расійскага дэпутата такія якасці якраз цэняцца.
