Аляксандр Лукашэнка прыняў сёння ўдзел у навагоднім дабрачынным свяце для дзяцей у рамках акцыі «Нашы дзеці», піша БелТА.
«Дарагія сябры, вы — галоўны набытак нашай Беларусі. Гэта не проста прыгожыя словы, за гэтымі словамі — шчырая любоў, жаданне клапаціцца і абараняць, — падкрэсліў Аляксандр Лукашэнка. — Гэта натуральныя эмоцыі, якія выклікаюць нашы малыя і дзеткі старэйшыя».
Ён прызнаўся, што прысутнічаць на дзіцячых навагодніх святах вялікі гонар і адказнасць. «Для мяне асабіста гэта хвалюючая місія: нішто ў жыцці не прыносіць такую радасць, як магчымасць падарыць дзецям казку, убачыць усмешку і радасць у вачах дзяцей. Для мяне як для прэзідэнта гэта шчасце - у мільёнах дзяцей, якія жывуць у нашай краіне», - сказаў кіраўнік дзяржавы.
Ён звярнуў увагу, што для яго няма нічога важней, чым мірнае і шчаслівае дзяцінства падрастаючага пакалення беларусаў. «Любы прэзідэнт, любы кіраўнік дзяржавы, кіраўнік любога ўзроўню ў той ці іншай краіне шчаслівы, калі дзеці жывуць у мірнай краіне», - адзначыў Лукашэнка.
