Бабушкінскі суд Масквы прыгаварыў да 10 гадоў калоніі строгага рэжыму нацыяналіста Максіма Марцінкевіча, вядомага як Цясак.

Марцінкевіч і некалькі яго паплечнікаў з руху «Рэструкт» паўсталі перад судом за акцыі «Акупай-наркафіляй», падчас якіх яны нападалі на меркаваных наркагандляроў, адзін з якіх памёр. Іх абвінавачвалі ў шэрагу злачынстваў, у тым ліку ў разбоі, хуліганстве і прычыненні цяжкай шкоды здароўю.

У 2017 годзе Цясак быў прыгавораны да дзевяці гадоў, але затым справу накіравалі на новы разгляд.

Зараз прысуд вынеслі за забойства Заіра Алышава, у 2014 рэструктаўцы збілі яго да смерці за гандаль спайсамі. Суд абавязаў абвінавачаных выплаціць радні забітага больш за 600 тысяч расійскіх рублёў (каля 10 тысяч даляраў). Самому Максіму далі 9 гадоў калоніі, з улікам старога прысуду — 10 гадоў.