Пажылая гродзенка пералічыла махлярам 3 000 даляраў, каб вырашыць праблемы сына
28 снежня 86-гадовай гродзенцы на гарадскі тэлефон патэлефанаваў невядомы, прадставіўся сынам, а таксама распавёў, што трапіў у непрыемную сітуацыю і яму патрэбныя грошы. Жанчына выслухала гісторыю «сына», а затым той перадаў трубку супрацоўніку праваахоўных органаў. «Прадстаўнік закона» распавёў, што гэты інцыдэнт можна ўладзіць за $6000, аднак пенсіянерка паведаміла, што ў яе няма такіх грошай, піша Hrodna.life.
Чалавек на іншым канцы проваду сказаў рэквізіты банка, куды неабходна перавесці грошы, а таксама нумар тэлефона, па якім трэба патэлефанаваць пасля грашовага пераводу. Нумар зарэгістраваны на тэрыторыі Літвы. Спалоханая пенсіянерка адправілася ў банк, перавяла $3000 на ўказаны рахунак.
Аказалася, што сын знаходзіцца ў Беларусі і ні ў якія непрыемныя сітуацыі ён не трапляў. Пенсіянерка стала ахвярай махляроў. Пасля таго, як падман быў раскрыты, жанчына звярнулася ў праваахоўныя органы.
Па гэтым факце распачата крымінальная справа па ч.3 арт. 209 КК — «Махлярства». Супрацоўнікі міліцыі шукаюць злодзеяў.
Каментары