08.01.2019 / 15:20

У Оршы прачыталі пасланне нашчадкам з 1969 года. Беларускамоўнае. І заклалі новае — рускамоўнае 23

Ліст 50 гадоў захоўваўся ў капсуле, закладзенай у сцяну будынка Аршанскага райвыканкама, піша Радыё Свабода.

На мармуровай шыльдзе, якой было адзначана гэтае месца, быў напісаны запавет: ускрыць 1 студзеня 2019 году. Сёньняшнія ўлады запавет парушылі: капсулу ўскрылі толькі 8 студзеня.

З гэтай нагоды каля райвыканкаму зладзілі мітынг, сабраўшы каля 300 жыхароў гораду. Паводле тэксту ліста, да іх зьвярталася ўсё 100-тысячнае насельніцтва тагачаснай Воршы.

«Ворша — наша любоў, наша гордасьць, наша баявая, рэвалюцыйная і працоўная слава. Для вас яна — гісторыя», — гаварылася ў допісе, агучаным старшынём райвыканкаму Ігарам Ісачанкам, які асабіста ўскрыў капсулу. 50-гадовы ліст быў напісаны па-беларуску, і некаторыя выразы маглі б прагучаць і ў прамовах сучасных чыноўнікаў:

«Мы завяшчаем вам: ганарыцеся горадам, які будавалі мы. Ён часьцінка нашай Радзімы, а Радзіму трэба любіць».

Пасланьне пачыналася віншаваньнем «зь вялікім сьвятам 50-годзьдзя БССР і Кампартыі Беларусі», а заканчвалася зваротам да нашчадкаў, якія ў 2019 годзе мусілі б жыць у «сьветлай будучыні»: «Мы бачым у вас рысы людзей камунізму».

Гістарычны ліст і капсулу перадалі ў Музэй гісторыі і культуры, а замест старой капсулы ў сьцяну заклалі новую, з чарговым пасланьнем да нашчадкаў, якое трэба будзе дастаць яшчэ праз 50 гадоў. Новае пасланьне напісанае па-расейску.

Тэкст ліста быў агучаны, у ім гаворыцца пра надзеі на лепшае і перамогу над жыцьцёвымі цяжкасьцямі. Але даведацца зьмест пасланьня змаглі толькі прысутныя на мітынгу. Як сказалі ў райвыканкаме, гэты тэкст нідзе друкавацца ня будзе. Чыноўнікі спадзяюцца, што будынак прастаіць яшчэ 50 гадоў.

6
ЯНКА / Адказаць
08.01.2019 / 15:32
★ СССР дбаў пра белмову лепей, чым лукашысты. ★
5
Ян Севярын Бакей / Адказаць
08.01.2019 / 15:48
вельмі характэрна ( і нічога ня трэба дабаўляць) . што пасланьне 1969-га было хаця б напісана па-беларуску, а ў 2019ым ўжо  нават гэтага няма...рускі штык і рускі поп адыйшлі на другі плян, але іх зь ліхвою замясьцілі рускамоўная адукацыя, тэлебачаньне. а цяпер і інтэрнэт. Магу толькі  паліткарэктна недапрацытаваць земляка Віктара Шалкевіча пра "добрай раніцы....(.нейкая).. нацыя, сонца узыходзіць лупатае,а ніхто .(ня вельмі разумную...)  не сватае"
4
Bac'ka Ihara / Адказаць
08.01.2019 / 15:52
Ганьба
Паказаць усе каментары/ 23 /
Каб пакінуць каментар, калі ласка, актывуйце JavaScript у наладах свайго браўзеру