У Расонскім раёне Віцебскай вобласці ёсць сядзіба «Заімка лесуна». Сюды прыязджаюць шмат замежнікаў, якія захапляюцца назіраннем за птушкамі.
Рэч у тым, што на «Заімцы» працуе адна з дзвюх беларускіх станцый кальцавання птушак, займаюцца ёй актывісты Аховы птушак бацькаўшчыны.
Арнітолагі выкладаюць у інтэрнэт некаторыя фота птушак, якіх акальцавалі. Прапануем вам падборку. Назвы пісаць не будзем: калі пазнаеце — то пішыце ў каменты.
«Мы ловім іх з навуковымі мэтамі: кальцаванне патрэбна, каб выявіць асаблівасці міграцыі, працягласць жыцця, месцы жыцця», — кажуць навукоўцы.
За 2018 год яны акальцавалі адзінаццаць тысяч птушак.
Ловяць іх у спецыяльныя сеткі.
«На большасці фота птушкі выглядаюць досыць спакойнымі, але гэта проста ўдалы кадр. Вядома, яны вырываюцца, б'юць. Вельмі цяжка з дзятламі — яны з моцнай доўгай дзюбай, адбіваюцца. А ў савы, напрыклад, вельмі тонкія і вострыя кіпці. Калі яна падзярэ, то зажываць будзе вельмі доўга. Мы намагаемся не трымаць птушак лішні час, для іх гэта стрэс. Калі фота не атрымліваецца — то і ладна, мо іншая пагодзіцца сфоткацца», — кажуць арнітолагі.
