11 студзеня ў нацыянальным выставачным цэнтры «БелЭкспа» Аляксандр Лукашэнка правёў традыцыйны прыём на стары Новы год. Сярод запрошаных былі міністры, артысты, спартсмены, бізнэсмены, піша Tut.by

Тут выступалі Стас Міхайлаў, Мікалай Баскаў, Таісія Павалій і Тамара Гвердцытэлі, Аляксандр Саладуха, Іна Афанасьева, Іскуі Абалян-Бароўская, Вікторыя Алешка, Алёна Ланская, Анастасія Ціхановіч, група «Цягні-Штурхай».

Аляксандр Саладуха быў запрошаны на прыём чацвёрты раз. Ён распавёў, што Стас Міхайлаў выканаў на прыёме дзесяць песень, столькі ж праспяваў і Мікалай Баскаў.

— Гэта было звышсвята! — сказаў Аляксандр Саладуха.

Іскуі Абалян-Бароўскай на мерапрыемстве ўручылі ганаровае званне заслужанай артысткі Беларусі.

Акрамя сваіх песень «Іншае жыццё» і «Новы дзень», спявачка разам з Алёнай Ланской і Настассяй Ціхановіч выканала кампазіцыю з фільма «Дзяўчаты».

Гімнастка Любоў Чаркашына распавяла, што сярод спартсменаў на мерапрыемстве былі біятланістка Дар'я Домрачава, байдарачніцы Вольга Худзенка, Марына Літвінчук, Маргарыта Махнева. Гімнастцы Кацярыне Галкінай Лукашэнка прысвоіў званне «Заслужаны майстар спорту Рэспублікі Беларусь».

Спявак, кампазітар, шоўмэн і тэлевядучы Герман Цітоў у сваім Instagram нават запосціў невялікае відэа з выступлення Стаса Міхайлава.

Сярод бізнэсменаў на прыёме быў расійскі мільярдэр Міхаіл Гуцэрыеў. Летась, нагадаем, прэс-сакратарка прэзідэнта Наталля Эйсмант распавяла «Народнай Волі», што расійскі бізнэсмен прыязджаў на мерапрыемства не адзін, а «разам са сваімі сябрамі — вядомымі артыстамі». Тады на прыёме выступалі Лепс, Наташа Каралева, Мікалай Баскаў, Таісія Павалій.

У інтэрв'ю сам мільярдэр не ўтойваў, што запрасіў у Беларусь некаторых вядомых выканаўцаў:

— Іх трэба загадзя запрашаць, таму што на стары Новы год яны альбо на Мальдывах, альбо ў Сочы катаюцца на лыжах. Аднаму патэлефанаваў- - кажа, не магу. Набраў Баскава: «Коля, трэба выступіць на канцэрце». Я для яго 5-6 песень напісаў проста так, бясплатна, як аўтар вершаў. Ён толькі спытаў, калі канцэрт. «Добра, ёсць». Я многім артыстам пішу песні. Мы з імі сябруем, маем зносіны. Калі каму-небудзь нешта трэба, то дапамагаем адзін аднаму. Хутка будзе мой дзень нараджэння. Яны таксама будуць выступаць. Я толькі заікнуўся пра тое, каб заплаціць ганарар. Яны ледзьве не пакрыўдзіліся: «Ты што нас абражаеш? Не крыўдзі нас». Калі вы запросіце мяне на свой дзень нараджэння, то я ў якасці падарунка папрашу артыстаў — і яны будуць спяваць бясплатна. Для гэтага не трэба грошай.