Незвычайны крадзеж адбыўся ў Мазыры: аўто на месцы, замкі не зламаныя, але ноччу машына калясіла па горадзе. Разабрацца ў сітуацыі дапамаглі камеры відэаназірання.

Раніцай мазырчук здзівіўся, прачытаўшы ў месенджары атрыманае сярод ночы паведамленне ад знаёмага таксіста: «Куды кірунак бярэш?» ​​Званок сябру выклікаў шэраг пытанняў: таксіст быў цалкам упэўнены, што не памыліўся і менавіта гэтую машыну бачыў каля гульнявога клуба.

Аднак Mercedes-Benz як і раней стаяў за акном, ды і ўсе замкі былі цэлыя.

Прыйшлося звяртацца ў міліцыю, дзе, дарэчы, паставіліся да гісторыі са скепсісам, але праверку правялі.

Камеры відэаназірання зафіксавалі, што менавіта гэты аўтамабіль пад'язджаў ноччу да гульнявога клуба. Праверка наведвальнікаў таксама дала вынік: падазрэнне ўпала на 20-гадовага хлопца, які пражывае ў раёне дома, дзе скралі аўто.

Аказалася, што ў свае 20 гадоў хлопец мае крымінальны досвед. У 2016 годзе ён скраў акумулятар з машыны, у наступным годзе скраў аўтамабіль. Але, вызваліўшыся ў 2018, вырашыў узяць машыну ў часовае карыстанне.

Зразумеўшы, што выкруціцца не атрымаецца, хлопец распавёў, як яму ўдалося зрабіць справу так, што нават уладальнік аўто нічога не заўважыў. Хлопец праверыў ручку машыны і выявіў, што дзверы незачыненыя. Больш за тое, старая мадэль завялася ключом ад іншай машыны. Таму нішто не перашкаджала скарыстацца аўтамабілем, пакуль усе спяць. Аднак выпадковы сведка зблытаў усе карты.

Цяпер ён зноў паўстане перад судом. Яму пагражае да 6 гадоў.

Хочаш падзяліцца важнай інфармацыяй ананімна і канфідэнцыйна?