Міністэрства культуры прыняло пастанову наконт мінскага раёна Асмалоўка, які яшчэ нядаўна хацелі знесці. Дакумент апублікаваны на сайце pravo.by.
Статус гісторыка-культурнай каштоўнасці трэцяй катэгорыі атрымаюць 11 будынкаў (на плане — аранжавага колеру), а 2-павярховая забудова Асмалоўкі аднесеныя да зоны рэгулявання забудовы. Паводле дакумента гэта азначае, у прыватнасці, што там забаранілі ўзвядзенне будынкаў і збудаванняў.
Чытайце таксама: Дзяржава вырашыла не зносіць Асмалоўку
Сваімі думкамі на гэты конт падзяліўся з «Нашай Нівай» адзін з актывістаў Андрэй Эзерын:
«Трэба ўсё ж удакладніць, што статус гісторыка-культурнай каштоўнасці датычыцца толькі некалькіх дамоў. Але мы трапілі ў ахоўную зону. Дакумент Міністэрства культуры сур’ёзны. Яго яшчэ, канечне, трэба вывучаць.
Але мне здаецца, што гэта перамога і сведчанне таго, што дамоклавага мяча над Асмалоўкай больш не будзе, — лічыць Андрэй Эзерын.
— Цяпер будзем развіваць Асмалоўку ў спакойным рэжыме. Гэта сур’ёзны крок наперад. Нас пачулі. І цяпер можна гаварыць пра тое, што сітуацыя з Асмалоўкай — гэта добры прыклад узаемадзеяння грамадскага і дзяржаўнага сектара. Будзем назіраць, у які бок будзе развівацца сітуацыя».
«Ніякага бравурнага заключэння, што Асмалоўка абароненая, быць не можа»
Так лічыць Юрась Меляшкевіч, намеснік старшыні Беларускага таварыства аховы помнікаў гісторыі і культуры.
«Асмалоўка, згодна з пастановай Міністэрства культуры, усяго толькі стала зонай рэгулявання забудовы. А самі дамы на мапе не пазначаныя як гісторыка-культурная каштоўнасць.
Што гэта значыць? Што на гэтай тэрыторыі дзейнічаюць будаўнічыя рэгламенты ў адпаведнасці з рашэннямі Мінкульту. Забудовы могуць зносіцца, ліквідавацца. І магчымасці так званых будучых інвестараў гэта ніяк не абмяжоўвае», — кажа Юрась Меляшкевіч.
Тэрыторыя Асмалоўкі ў дакуменце ўмоўна падзеленая на некалькі зон. Напрыклад, вытрымка з пастановы Міністэрства культуры: «На тэрыторыі зоны рэгулявання забудовы першага рэжыму ўтрымання забараняецца: узвядзенне будынкаў і збудаванняў, надбудова вышэй за адзнаку 223 метры ў Балтыйскай сістэме вышынь».
Юрась Меляшкевіч каментуе: «Фактычна гэта азначае, што на тэрыторыі Асмалоўкі можна з нуля будаваць пяціпавярховікі, і гэта не будзе парушаць правілаў рэгуляванай забудовы. Мы, канечне, яшчэ будзем вывучаць дакумент падрабязна, але ўжо цяпер можна сказаць, што ніякіх бравурных словаў пра тое, што Асмалоўка абароненая, быць не можа».
Цяпер чытаюць
Азараў закрыў план «Перамога» і перавёў усіх удзельнікаў у рэзерв12
Азараў закрыў план «Перамога» і перавёў усіх удзельнікаў у рэзерв
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве2828
Каментары