У канцы мінулага тыдня Лукашэнка пракаментаваў нядаўні канфлікт у мінскім метро, відэа якога расійскія СМІ выкарыстоўвалі як прыклад нападак на рускіх у Беларусі. На відэа пасля кароткай сутычкі беларускамоўны мужчына выганяе з вагона метро пасажыра ў шапцы казака. Свае дзеянні ён суправаджае словамі: «Чамадан, вакзал, Расія». Паводле слоў Аляксандра Лукашэнкі, даведаўшыся пра гэты інцыдэнт, ён даручыў неадкладна разабрацца. Сёння прэзідэнт зноў успомніў пра канфлікт на відэа і запэўніў, што рускіх з беларусамі сутыкнуць не атрымаецца. Tut.by распытаў аўтара здымкі, што ж адбылося ў метро і ці выклікалі яго з-за гэтага ў міліцыю. Другі ўдзельнік канфлікту з журналістамі размаўляць адмовіўся, у ГУУС інцыдэнт пакуль не пракаментавалі.
Чытайце таксама:
Лукашэнка пра канфлікт з «казаком» у метро: Былы амапавец супраць іншага напаўадмарожанага беларуса. Там рускімі і не пахла
НТВ: Хто ў страшным сне мог прадказаць, што ў Беларусі будуць нападаць на людзей толькі таму, што яны рускія?
Кадр з сюжэта НТВ 14 студзеня.
«Я разумею, што ўсякія могуць быць выпадкі. Аказваецца, там рускімі, як яны кажуць, і не пахла. Гэта быў канфлікт двух мудакоў-беларусаў. Інакш не скажаш. Прытым ён хутка быў зняты на відэа (цяпер гэта проста робіцца) і укінуты ў інтэрнэт. І яны (расійскія СМІ. — Заўвага.) За гэта ўхапіліся. Аказваецца, адзін беларус, які калісьці быў асуджаны (супрацоўнік АМАП, за хабар быў пасаджаны, выйшаў з турмы). Другі быў таксама беларус паўадмарожаны. І завязалася бойка. Прычым тут рускія?!» — распавёў Аляксандр Лукашэнка.
Малады чалавек просіць не называць у тэксце яго імя і прозвішча. Для прастаты будзем называць яго Аляксей. Лёшу ледзь за дваццаць, на інтэрв'ю ён прыйшоў у вышыванцы. Распавядае, што ў яго вышэйшая адукацыя, цяпер у запланаваным адпачынку, а ў сярэдзіне лютага ў дзяржустанове, дзе ён працуе, яму аддадуць працоўную.
— У мяне заканчваўся кантракт. На наступны дзень пасля інцыдэнту мне прынеслі паперу аб тым, што дагавор са мной не працягнуць, — распавядае суразмоўца. — З кіраўніцтвам мы не заўсёды разумелі адзін аднаго, таму размовы пра маё звальненне былі і раней, — кажа ён.
Аб рабоце, якая зусім хутка стане былой, Аляксей не шкадуе. Зараз, кажа, ён у пошуку. Сітуацыю з «казаком» называе палітычным перфомансам.
— Я ехаў з сябрам у метро і ўбачыў на пероне чалавека ў папасе. Падышоў да яго і ўключыў відэа. Калі я стаў здымаць, ён пачаў адварочвацца. Потым мы пачалі адзін аднаго абражаць. Ён мяне паслаў і зайшоў у вагон. Думаў, я звалю. Але нешта пайшло не так.
«Нешта пайшло не так» — гэта значыць, што Аляксей таксама зайшоў у вагон, а пазней збіў з галавы мужчыны папаху. Па словах маладога чалавека, у той момант ён быў цвярозы. Пры гэтым ні ён, ні яго апанент адзін аднаго не білі.
— А чым ён вас першапачаткова ўсхваляваў?
— Папахай. Выкарыстанне папахі, сведчыць пра датычнасць да субкультуры казакаў, — кажа суразмоўца. — Калі чалавек апранаецца, не так, як усе, ён ставіць пад пагрозу ўласны грамадскі спакой. Ён парушае маё права, я адпаведна — яго.
На пытанне аб тым, як папаха парушыла яго правы, Аляксей адказвае, што ён і яго ідэйныя таварышы спрабуюць «супрацьдзейнiчаць расійскай пагрозе».
— Гэта разборкі паміж субкультурамі. Умоўна кажучы, гэта так, як было ў 1990-х. Калі канфлікт мог узнікнуць паміж, напрыклад, гопнікамі і панкамі. Увогуле, у нас правілы такія: іх актывісты не кранаюць нас, мы іх. Але разы два на месяц паміж намі адбываюцца канфлікты з-за цішотак ці стужак. Калі ты ў гэтым варышся, разумееш, што ўсё гэта натуральна.
Пры гэтым кажа, што падчас канфлікту яму не важна было, рускі перад ім ці, напрыклад, беларус. Справа была выключна у папасе, якой «чалавек дэманстраваў сваю прыналежнасць да казацкай субкультуры».
На пытанне, навошта ўсё здымалі на відэа, адказвае: для бяспекі.
— Для ўласнай бяспекі кожны чалавек можна выкарыстоўваць розныя сродкі самаабароны, — тлумачыць хлопец. — Калі ёсць відэа, аспрэчыць нешта ў судзе становіцца складана.
Відэа канфлікту Аляксей з сябрамі выклалі ў інтэрнэт самі. На тое, што ролік так падхопяць расійскія СМІ, адрэагавалі спакойна. У прынцыпе, кажа, такой рэакцыі яны і чакалі. Спасылку на навіну, дзе сітуацыю каментуе Аляксандр Лукашэнка, яму скінулі сябры. Асаблівага здзіўлення усё гэта ў маладога чалавека не выклікала.
— А як вы адрэагавалі на фразу пра канфлікт беларусаў-мудакоў?
— Гэта найлепшая пахвала, — адказаў Аляксей. — Усім вядома, калі нам кажуць, не чакайце дэвальвацыі, значыць яна будзе. Але калі ён выказаўся, для сябе я вырашыў: раз да гэтага не затрымалі, то ўжо і не затрымаюць.
— А маці што сказала?
— Яна нічога не ведае, і дай Бог не даведаецца, — усміхаецца хлопец. — Але ўвогуле, сям’я звыкла, што каля мяне заўсёды нешта неспакойнае адбываецца.
З мужчынам у папасе пасля інцыдэнту Аляксей не сустракаўся і сэнсу ў гэтым не бачыць. Сам гэты чалавек размаўляць з TUT.BY адмовіўся. Праз знаёмага, з якім мы размаўлялі, ён перадаў, што яго выклікалі ў праваахоўныя органы, і па падрабязнасці параіў звярнуцца туды. Аляксей жа кажа: яго ў міліцыю пакуль не выклікалі.
Прэс-служба ГУУС сітуацыю пакуль не пракаментавала.
