Сайт Беларускай асацыяцыі журналістаў паведамляе, што гомельскі журналіст Кастусь Жукоўскі, які супрацоўнічаў з «Белсатам», выехаў з Беларусі. За ім пакінула краіну і яго сям’я — жонка з дачкой.
Кастусь Жукоўскі. Фота Радыё Свабода
З тэксту вынікае, што эміграваць Жукоўскі хацеў прынамсі ўжо нейкі час, але «апошняй кропляй, якая перапоўніла чашу цярпення, стаў напад на яго аўтамабіль 13 студзеня на дарозе Холмеч — Брагін — Хойнікі».
«Па словах Жукоўскага, разам са сваім спадарожнікам Барысам Анікеевым яны спыніліся, каб праверыць, чаму пераграваецца рухавік. Іх машыну ўзялі ў аблогу чацвёра дзябёлых мужчын, якія адразу ж пад’ехалі на джыпе», — паведамляе БАЖ.
«Наша Ніва» не здолела аператыўна звязацца з Жукоўскім, каб удакладніць дэталі.
Сам Барыс Анікееў паведаміў нам, што нічога не бачыў, бо ў момант здарэння ён па патрэбе спусціўся ўніз з дарогі.
«Мы выехалі. Ніхто не думаў, што так атрымаецца. Ягоная «Таёта» паціху глухла, мы выйшлі глянуць, што там. Я спусціўся, а калі падымаюся — там ужо гвалт стаіць, мне ў вочы пырснулі нечым. Парвалі таксама Кастусю пашпарт, ён у машыне пад лабавым ляжаў, але там стары пашпарт», — сказаў Анікееў.
Ці бачыў ён нумары, што ў нападнікаў была за машына?
«Недзе з паўкіламетра яна за намі ехала. Ну там, можа, УАЗік, ці нешта такое. Яны за метраў 30 спыніліся ад нас і потым падышлі», — дадаў ён.
На думку Анікеева, Жукоўскі будзе прасіць палітычны прытулак.
«Я б прасіў палітычны, тут жа і пагрозы яму былі, звяртаўся ён у пастарунак, але там нічога не знайшлі — яны былі з ананімных службаў дасланыя», — патлумачыў Анікееў.
Пра выпадак на трасе яны заяўляць у міліцыю не сталі, бо «няма даверу».
Кастусь Жукоўскі ў дадзены момант надасяжны для якіх-небудзь каментароў, дзе ён знаходзіцца, таксама невядома. Апошні запіс у ягоным фэйсбуку — гэта расшаранае відэа аб тым, як знайсці працу ў Чэхіі.
Кастусь Жукоўскі супрацоўнічаў з «Белсатам» і стаў рэкардсменам па выпісаных штрафах. Гэта стратэгія беларускіх уладаў — даваць журналістам штрафы за супрацоўніцтва з замежнымі каналамі, якія не маюць афіцыйнай акрэдытацыі. На суды Жукоўскі хадзіў у паласатай чорна-белай робе.
Перыядычна Жукоўскі таксама шакаваў грамадскасць смелымі перформансамі, напрыклад, зашыўшы сабе рот на відэа (увага, шакуючы кантэнт).
Таксама ён займаўся і палітычнай дзейнасцю, балатаваўся ў дэпутаты.
