30.01.2019 / 17:25

Супрацоўнікі ДАІ прыехалі на Камароўку на аўтамабілі, які аўтаматычна выпісвае штрафы парушальнікам паркоўкі ВІДЭА 6

Парушэнні правілаў спынення і стаянкі транспартных сродкаў супрацоўнікі сталічнай Дзяржаўтаінспекцыі актыўна выяўляюць з дапамогай апаратна-праграмнага комплексу (АПК) «ПаркРайт». Як гэты цуда-прыбор працуе, высвятляў карэспандэнт агенцтва «Мінск-Навіны».

Адпраўляемся з інспектарам ДПС аддзела ДАІ Савецкага РУУС Вадзімам Цупрыяновічам на службовым аўтамабілі па вуліцах вакол Камароўскага рынку, дзе з дня ў дзень адзначаецца нямала парушэнняў правілаў паркоўкі. Ён замацоўвае прыбор на лабавым шкле, наладжвае на працу.

Інспектар накіроўвае камеру на правы бок дарогі, дзе ў зоне дзеяння знака, які забараняе спыненне, размясціліся аўтамабілі. Дзесьці машыны стаяць у два шэрагі. «ПаркРайт» ідэнтыфікуе рэгістрацыйныя знакі транспартных сродкаў, якія трапілі ў зону назірання камеры, і распазнае іх.

Месцазнаходжанне патрульнага аўтамабіля вызначаецца з дапамогай навігацыйнага прыёмніка GPS. Выязджаем з зоны кантролю. Цяпер нам трэба зрабіць кола, каб прайшло не менш за 5 хвілін. Калі за гэты час зафіксаваныя камерай машыны не пакінуць месца стаянкі, прыбор занясе іх у спіс парушальнікаў правілаў.

АПК захоўвае ў памяці нумары аўто. Пасля дадзеныя апрацоўваюць, пастановы аб накладанні адміністрацыйнага спагнання высылаюць па пошце ўласнікам транспартных сродкаў. У так званы «ліст шчасця» акрамя пратакола з указаннем дня, часу і месца здзяйснення правапарушэння ўкладваецца фота аўтамабіля.

Па словах В. Цупрыяновіча, забараняльныя знакі тут усталяваны не выпадкова. У гадзіны пік і ў выходныя дні няправільна прыпаркаваны транспарт можа стаць прычынай затору. Аднак кіроўцы ўсё роўна ставяць машыны з парушэннем правілаў, хоць па суседстве ў паркінгах ёсць вольныя месцы. У такой сітуацыі «ПаркРайт» вельмі карысны. За дзень прыбор фіксуе прыкладна 40 парушэнняў правілаў прыпынку і стаянкі транспартных сродкаў. Такая лічба была і ў гэты раз.

У ДАІ адзначаюць: у горадзе ёсць нямала месцаў, дзе нават пад забараняльным знакам утвараюцца стыхійныя стаянкі транспарту, якія абцяжарваюць праход пешаходаў і праезд. З'яўленне ў такіх месцах службовага аўтамабіля з «ПаркРайтам» павышае дысцыпліну сярод аўтамабілістаў.

7
Юрась ВКЛ / Адказаць
30.01.2019 / 19:30
Супрацоўнік ДАІ кіруе аўтамабілем трымаючы тэлефон у руках!!!! Амаль тое ж самае што размаўляе па тэлефоне падчас язды, прыцягнуць да адказнасці )))))))))
2
бульбон / Адказаць
30.01.2019 / 20:38
Чамусьці гэны ДАІшнік не ўзгадывае, што на той паркоўцы яшчэ ёсць месца для стаянкі аўтамабіляў інвалідаў, і якая заўсёды занятая звычайнымі аўто. Чаму іх не штрафуюць? Няма такой функцыі ў прыборы? Дык у нас жыж ІТ краіна, дапрацуйце!
2
Валерык / Адказаць
30.01.2019 / 20:59
Фактычна на такім аўто можна па дваравых месцах праехаць. Так за суткі дзесяткі соцен штрафаў можна назбіраць.
Паказаць усе каментары/ 6 /
Каб пакінуць каментар, калі ласка, актывуйце JavaScript у наладах свайго браўзеру