Зніклы лёгкаматорны самалёт Piper PA-46 Malibu, на якім ляцеў 21 студзеня з Нанта ў Кардыф форвард валійскага футбольнага клуба «Кардыф» Эміліяна Сала, знойдзены на дне праліва Ла-Манш.
Пра гэта паведамляе тэлеканал Sky News са спасылкай на кіраўніка кампаніі Blue Water Recoveries вучонага-акіянографа Дэвіда Мернса, каманда якога займалася пошукамі самалёта.
Мернс асабіста ўзначаліў групу пошукавікаў на судне FPV Morven, ім дапамагала каманда Упраўлення па расследаванні авіяцыйных здарэнняў Вялікабрытаніі (AAIB) на судне Geo Ocean III.
«Гэта найлепшы вынік, які мы маглі прынесці сем'ям [зніклых без вестак]», — сказаў Мернс у інтэрв'ю Sky News. Карэспандэнт тэлеканала паведаміў, што самалёт быў знойдзены на дне Ла-Манша раніцай 3 лютага, пасля чаго група Мернса ўвесь дзень праводзіла яго ідэнтыфікацыю.
