Расійска-беларускія адносіны апошнім часам не ладзяцца. Нядаўнюю прапанову Уладзіміра Пуціна паглыбіць інтэграцыю дзвюх краін у Мінску ўспрынялі з вялікай насцярожанасцю. У выніку беларуская дзяржава занялася ўмацаваннем межаў і пошукам новых знешнепалітычных перспектыў, адзначае Lenta.ru.
Выданне звяртае ўвагу на візіт у Беларусь памочніка кіраўніка Дзярждэпа ЗША па справах Еўразіі Уэса Мітчэла, работніка ключавых амерыканскіх аналітычных цэнтраў Майкла Карпентара, які раней займаў высокую пасаду ў Радзе нацыянальнай бяспекі пры прэзідэнце ЗША, а таксама эксперта Цэнтра па аналізе еўрапейскай палітыкі Бэна Ходжэса.
Lenta.ru лічыць, што такіх высокапастаўленых гасцей «аналітыкамі» можна назваць умоўна — яны маюць багаты практычны вопыт за плячыма.
Аляксандр Лукашэнка і Уэс Мітчэл. Фота: прэс-служба прэзідэнта Беларусі.
«Украінскі крызіс стаў для беларускага кіраўніцтва своеасаблівым тэстам на адданасць саюзу з Расіяй, які яно праваліла. Пачынаючы з 2014 года Лукашэнка спрабаваў знайсці новыя формы ўзаемаадносін з Расіяй і Захадам дзеля атрымання палітычных і рэсурсных прывілеяў з іх супрацьстаяння»,
— піша Lenta.ru.
Журналіст сайта ўпэўнены, што канчатковае рашэнне пра пошук хаўрусніцкіх альтэрнатыў Лукашэнка прыняў пасля ўвядзення Расіяй так званага падатковага манеўру.
Бэн Ходжэс (злева) 5 лістапада 2018 каля стэлы «Мінск — горад-герой». Фота: прэс-служба МЗС Беларусі.
Lenta.ru піша, што ўсё супрацоўніцтва Беларусі і ЗША не абмяжоўваецца кароткімі візітамі дыпламатаў і адстаўных вайскоўцаў.
«Наадварот, нягледзячы на ўсе абмежаванні, Штаты сістэмна выбудоўваюць працу не толькі з дзяржавай, але і з беларускім грамадствам»,
— піша выданне.
Журналіст Lenta.ru піша, што Расія мала што можа прапанаваць у адказ.
Таксама выданне ўпэўнена, што пытанні дэмакратыі не стануць перашкодамі — ЗША здольныя падтрымліваць і недэмакратычныя рэжымы.
Lenta.ru нагадала, што ў мінулы чацвер, 31 студзеня, выступаючы ў Атлантычнай радзе ў Вашынгтоне намеснік кіраўніка беларускага МЗС Алег Краўчанка абвясціў пра адмену абмежаванняў на колькасць амерыканскіх дыпламатаў у Беларусі.
«Пры гэтым на закрытай частцы пасяджэння тон беларускага дыпламата некалькі змяніўся. Па некаторых даных, Краўчанка прапаноўваў правесці ў Беларусі вучэнні НАТА і размясціць у краіне амерыканскіх спецыялістаў па даследаванні сацыяльных сетак і кантролі над інтэрнэтам. Апытаныя Lenta.ru эксперты назвалі гэтыя звесткі вельмі дакладнымі. Як відаць, Беларусь ужо зрабіла свой выбар»,
— піша Lenta.ru.
Варта адзначыць, што не ўсе публікацыі Ленты.ру пра Беларусь утрымліваюць даставерную інфармацыю. Часам выданне выдае фантазіі за рэаліі.
