fcbate.by
БАТЭ пагадзіўся прадаць паўабаронцу Мірка Іваніча ў «Црвену Звезду». Пра гэта паведамляюць сербскія сайты mondo.rs і novosti.rs.
Паводле інфармацыі крыніц, хаўбек прыбудзе ў Бялград з Турцыі, дзе БАТЭ праводзіць трэніровачны збор, і ў выпадку ўдалага праходжання медыцынскага агляду заключыць з новым клубам двухгадовы кантракт.
Фінансавы бок пагаднення пакуль не называюць.
Раней у сербскіх СМІ з'яўлялася інфармацыя, што «Црвена Звезда» накіравала БАТЭ афіцыйную прапанову па трансферы футбаліста. Бялградскі клуб быў гатовы заплаціць за 1,2 млн еўра, але беларускі бок прасіў 1,7 млн еўра. Мяркуецца, што бакі пагадзіліся на 1,3 млн.
Іванічу новыя босы абяцалі зарплату 30 000 еўра ў месяц.
Да заканчэння тэрміну дзеяння кантракту Іваніча з БАТЭ застаецца шэсць месяцаў. У «Црвену Звезду» ўжо бясплатна перайшоў экс-абаронца «жоўта-сініх» Неманья Мілунавіч.
Трансфернае акно ў Сербіі зачыніцца 8 лютага.
Іваніч гуляў за БАТЭ ад 2016 года.
