26 сьнежня, у другі дзень цудоўнага Сьвята Нараджэньня Хрыстовага паводле новага стылю, у 14‑00 у тэатральнай залі Чырвонага Касьцёла Сьв. Сымона і Алены адбудзецца канцэрт «Беларускі Хрысьціянскі Хіт».
У канцэрце на Раство возьмуць удзел гурт «Псальмяры», выканаўцы Андрэй Мельнікаў, Інэса Леаданская, Ядвіга і Ганна Багдановічы, Алесь Наркевіч, а таксама чакаецца ўдзел хору «Глёрыя». Уваход вольны.
Акурат да канцэрта, у 3‑й дэкадзе сьнежня выходзіць чарговы дыск з серыі Беларускі хрысьціянскі хіт пад назвай «Хрыстос Нарадзіўся» – трэцяя зборка найлепшых беларускамоўных хрысьціянскіх сьпеваў, гэтым разам прысьвечаных сьвяту Хрыстовага Нараджэньня. Сьпевы, якія ўвайшлі ва ўсе 3 складанкі, адабраныя паводле строгіх крытэраў, прайшлі ратацыю ў хрысьціянскіх фокус‑групах (адпаведна праваслаўнай, каталіцкай, грэка‑каталіцкай, баптысцкай, пяцідзесятніцкай, поўнаэвангельскай — і г.д.), і вернікі самі вызначылі найлепшыя сярод іх. Найбольш хітовымі выканаўцамі слухачы прызналі гурты «Тэзаўрус», «Псальмяры», «DVA», «Небасхіл», «Кадаш». Сярод выканаўцаў – Алеся Ўнукоўская, барды Андрэй Мельнікаў, Вальжына Цярэшчанка і Інэса Леаданская ды іншыя. Пачынаюцца ўсе дыскі «Беларускага Хрысьціянскага Хіта» гімнам «Магутны Божа», сканчаюцца – сьпеўнай малітвай «Ойча наш».
На канцэрце можна будзе набыць усе тры першыя кружэлкі: «Беларускі Хрысьціянскі Хіт», «Беларускі Хрысьціянскі Хіт‑2» і «Хрыстос нарадзіўся» (Хрысьціянскі Калядны Хіт). Інфармацыю пра канцэрт можна атрымаць па тэлефонах: 8‑029‑307‑27‑13 (Валерыя), 8‑029‑593‑50‑66 (Ірына).
Рыхтуюцца да выданьня таксама іншыя дыскі гэтай серыі «Хрыстос уваскрос!» (Беларускі Велікодны Хіт), «Беларускі Хрысьціянскі Рок», «Бардаўскі Хрысьціянскі Хіт» і «Беларускі Літургічны Сьпеў». Наконт усіх прапановаў на гэтыя складанкі, а таксама па замовы дыскаў можна зьвяртацца па тэлефонах: 8‑029‑861‑62‑28, 8‑029‑656‑00‑64 (Валянціна).
