Уладзімер Зяленскі збірае пратэставыя галасы.
У тройцы лідараў прэзідэнцкай гонкі ва Украіне змены. Як паказала апытанне сацыялагічнай службы Greenberg / Quinlan / Rosner, рэйтынг Юліі Цімашэнка зніжаецца, а вось шоўмэн Уладзімір Зяленскі стаў выразным лідарам выбарчых сімпатый.
На сёння за Зяленскага гатовыя прагаласаваць 28% выбарцаў, якія гатовыя прыйсці на ўчасткі. З адрывам ад яго на другім месцы ідзе дзейны прэзідэнт Пятро Парашэнка (18%) і Юлія Цімашэнка (15%).
На старце прэзідэнцкай гонкі наперадзе ішла Цімашэнка.
Рэйтынгі астатніх кандыдатаў застаюцца практычна нязменныя.
Юры Бойка, які абапіраецца на прарасійскіх выбарцаў усходу і поўдня, збірае 9%.
Былы міністр абароны Грыцэнка, якога падтрымліваюць антыалігархічныя і празаходнія колы, — 8%.
Папуліст Ляшко можа разлічваць на 6%.
Мэр Львова Садовы набірае 3% галасоў.
Яшчэ 3% выбарцаў падзеленыя між двума іншымі кандыдатамі з колаў былой Партыі рэгіёнаў, гэта Вілкул (каранямі ён з Крывога Рога) і Мураеў (Харкаў).
Кандыдат ад нацыяналістаў з аб'яднання «Свабода» Кашулінскі можа разлічваць на 1% галасоў, як і былы кіраўнік Службы бяспекі Украіны Налівайчанка, які таксама абапіраецца на патрыятычны электарат.
Пятро Парашэнка карыстаецца найбольшай падтрымкай у Кіеве, на захадзе і ў цэнтры Украіны. Ён у сваёй агітацыі робіць акцэнт на ўмацаванне арміі, якая паспяхова трымае абарону на лініі размежавання ў Данбасе, і нацыянальнай ідэнтычнасці. У прыватнасці, яму ўдалося дабіцца прызнання аўтакефальнай праваслаўнай царквы. Акрамя таго, Парашэнка падкрэслівае, што ўдалося дабіцца эканамічнай стабілізацыі, заробкі растуць, а доля ценевай эканомікі рэкордна ўпала. Крытыкі Парашэнкі вінавацяць яго ў кансервацыі алігархічнага кантролю над эканомікай і вывадзе сродкаў у афшоры.
Зяленскі найбольш папулярны на поўдні і ўсходзе Украіны. Крытыкі адзначаюць яго цесную сувязь з алігархам Ігарам Каламойскім. Шоу Зяленскага выходзіць на тэлеканале, які належыць Каламойскаму. Акрамя таго, ставіцца пад сумнеў здольнасць Зяленскага быць галоўнакамандуючым.
