У Мінску працягваецца працэс па «справе БелТА». Галоўнаму рэдактару Tut.by Марыне Золатавай прад'яўленае абвінавачванне па ч. 2 арт. 425 КК («Бяздзейнасць службовай асобы»). Сваю віну яна не прызнае. Сёння дапытваюць рэдактараў партала.
Трэці дзень суда пачаўся з допыту рэдактара партала Ганны Рудэнка.
Яна распавядае, што ў пэўны перыяд рабіла заходы на платную падпіску БелТА па лагіне газеты «Рэспублiка»: «Гэта не ўваходзіла ў мае абавязкі, хутчэй, гэта была мая асабістая цікаўнасць».
Паводле яе слоў, галоўны рэдактар Марына Золатава не ведала пра тое, што Ганна Рудэнка выкарыстала чужы пароль ад БелТА. 19 сакавіка 2018 года гэта пытанне абмеркавалі ў рэдакцыі: «Марына Золатава была здзіўленая і абураная, казала пра тое, што мы выкарыстоўваем інфармацыю толькі з адкрытага доступу».
Ганна Рудэнка кажа, што за 6,5 гадоў працы Марына Золатава ніколі не давала ёй прамых указанняў нешта рабіць ці не рабіць.
— Калі няма выразна выпрацаваных механізмаў, за кошт чаго Tut.by захоўвае такія высокія месцы ў рэйтынгах? — пытаецца юрыст «СБ», які прадстаўляе на судзе пацярпелы бок.
— За кошт высокага прафесіяналізму і даверных адносін у рэдакцыі, — кажа Ганна Рудэнка. — Я не ведаю, як яшчэ на гэта адказаць.
Суддзя пытаецца: раз сведка ведала пра размову 19 сакавіка 2018 года, чаму яна працягнула заходзіць «па звычцы» на платную падпіску БЕЛТА.
- Гэта была мая дурасць, я вельмі аб ёй шкадую. (…) Марына Золатава не ведала пра мае заходы. Гэта маё парушэнне, і я за гэта заплаціла, - адзначае Ганна Рудэнка.
Пасля допыту было прынята рашэнне абвясціць паказанні рэдактара, дадзеныя падчас папярэдняга расследавання, якія яна давала ў рамках крымінальнай справы ў якасці падазраванай. Пасля праслухоўвання сведка задае пытанне: «Дык у чым супярэчнасці?» Яна выказвае нязгоду з тым, што і пратаколы ператрусу пракурор Юлія Харчэйкіна збіраецца абвясціць. Рудэнка адказваюць, што так патрабуецца, і зачытваюць.
- Высокі суд, прашу звярнуць увагу, што другі раз абвяшчаюцца паказанні, у якіх няма супярэчнасці (напярэдадні пракурор па гэтай жа прычыне зачытвала допыты і пратаколы ператрусу рэдактара партала Ульяны Бабаед). Гэта зацягванне працэсу, - заяўляе Марына Золатава.
Наступнай дапытваюць рэдактара партала Галіну Уласік.
Яна таксама кажа, што з галоўным рэдактарам Марынай Золатавай ніколі не абмяркоўвала платную падпіску. Чаму карысталася? Тлумачыць, што ў падпісцы структураваная інфармацыя, прасцей адсачыць абнаўленні, няма «ўсялякага шлаку», што ёсць на сайце.
- Мяне затрымлівалі 7 жніўня, сказалі, што праходжу ў якасці сведкі. Мне трэба праехаць у СК, а потым мяне адпусцяць.
На допыце ў СК мне было сказана, што я павінна сказаць: «Гэта (заходы ў падпіску БелТА) было зроблена па прамым указанні кіраўніцтва». Але раз я не іду на кантакт, я ўжо не сведка, а падазраваная».
З ІЧУ выйшла 9 жніўня, - распавяла сёння ў судзе Галіна Уласік.
Рэдактар Tut.by: Кожная прачытаная навіна БелТА каштавала мне 451 рубель
