19.02.2019 / 13:29

Следчы камітэт: У Беларусі не было здарэнняў, звязаных з гульнёй «Мома» 4

Пасля трагедыі ў Мінску, калі з акна шматпавярховіка выпала пяцікласніца, у бацькоўскіх вайбер-чатах сталі з'яўляцца панічныя паведамленні. Практычна ідэнтычныя па змесце, яны расказвалі пра датычнасць да смерці дзяўчынкі нейкай гульні «Мома», якая вірусна распаўсюджваецца ў месенджарах, піша Еўрарадыё.

Афіцыйны прадстаўнік Следчага камітэта Сяргей Кабаковіч расказаў Еўрарадыё, што не варта паддавацца на такога кшталту інфармацыйныя ўкіды:

«Усім, хто распаўсюджвае і чытае гэтыя чуткі ў розных чатах, я рэкамендую толькі адно: не верыць гэтым чуткам, якія там распаўсюджваюцца. Бо хто-небудзь з дзяцей чытае гэтыя бацькоўскія чаты, і зноў жа атрымлівае інфармацыю, што нейкая гульня ў нас нібыта прысутнічае. А з нагоды падобных гульняў я скажу так: дзеці даўным-даўно ўсё прачыталі, усё ведаюць, а бацькі «біць па хвастах» толькі пачынаюць».

Што тычыцца здарэння з пяцікласніцай, то пакуль следства не скончылася і казаць пра прычыны таго, што адбылося, рана. Прадстаўнік СК падкрэслівае: на сёння ніякіх трагічных выпадкаў, звязаных з гульнёй «Мома», у Беларусі не зарэгістравана.

«Следчыя дзеянні і працэсуальныя мерапрыемствы па той трагічнай нагодзе яшчэ працягваюцца. Следчыя разбіраюцца ва ўсіх акалічнасцях здарэння, — тлумачыць Сяргей Кабаковіч. — На тэрыторыі Беларусі, па меншай меры, на сённяшні час, якіх-небудзь выпадкаў, у тым ліку трагічных, звязаных з так званай гульнёй «Мома», не зарэгістравана».

«Бацькам трэба ўдумліва і з разуменнем ставіцца да таго, што дзіця робіць у сацсетках»

Людзям, якія распаўсюджваюць паведамленні пра датычнасці гульні «Мома» да гібелі школьніцы, афіцыйны прадстаўнік СК парэкамендаваў думаць, што яны робяць:

«Людзі якія распаўсюджваюць гэтыя чуткі, гэтую ахінею, павінны быць асцярожнымі з такімі рэчамі, таму што гэта выклікае чарговы вал. Як ужо было пра цукеркі з псіхатропамі, якія нібыта распаўсюджвалі. Або пра шчанюкоў, якіх выкідвалі з машыны, каб нібыта выкрадаць дзяцей на вуліцы.

Мы разумеем, што бацькі такім чынам хочуць прыцягнуць увагу грамадскасці, каб людзі больш сачылі за сваімі дзецьмі», — кажа ён, але рэкамендуе бацькам больш звяртаць увагі на тое, што робяць іх дзеці ў сацсетках, прысутнічаць там і выбудоўваць даверлівыя адносіны са сваім дзіцём.

«Рэкамендацыі простыя. Першае: не верце чуткам, якія распаўсюджваюцца. Другое: такіх трагічных выпадкаў, звязаных нібыта з распаўсюджваннем гульні, у нас не зарэгістравана. Трэцяе: ідзіце разам з дзецьмі ў сацыяльныя сеткі, ведайце, што робіць там дзіця. Бацькам трэба ўдумліва і з разуменнем ставіцца да таго, што дзіця робіць у сацсетках. Гэта павінна быць на падставе даверу да бацькоў, і тады ўсё будзе ў парадку. Чацвёртае: навучыцца самім бацькам паводзіць сябе правільна ў сацсетках. Бацькі часцяком самі ў сацсетках знаходзяцца дзеля забавы, і вельмі часта не ўмеюць сябе там паводзіць. А потым мы глядзім на нашых дзяцей. Яны ж бяруць прыклад з бацькоў.

Больш увагі трэба звяртаць не на нейкія нібыта гульні, а на тое, з кім дзіця кантактуе. Ёсць маса іншых выпадкаў. Той жа грумінг. Абразы і цкаванне дзяцей у сацсетках, у пабліках і чатах, дзе яны кантактуюць».

У Momo гуляюць праз месенджары, напрыклад Viber або WhatsApp. Страшная японская лялька дадаецца да дзіцяці ў кантакты і загадвае пісаць ёй, а інакш пагражае праклёнамі. Momo можа тэлефанаваць і перадаваць страшныя гукі, патрабаваць патэлефанаваць ёй і дасылаць малюнкі і відэа са сцэнамі гвалту.

Мексіканская паліцыя прыйшла да высновы, што гэта ўсё робіцца, каб скрасці персанальныя дадзеныя ўладальніка смартфона, у Расіі гульню звязалі з сумна вядомым «Сінім кітом». А ў Беларусі пра Momo да нядаўняга часу не чулі.

9
Дмитрий222 / Адказаць
19.02.2019 / 14:35
У меня сын 8 лет только поржал. Учите детей думать, вот и все. :)
3
Жвір / Адказаць
19.02.2019 / 23:05
Дмитрий222
У меня сын 8 лет только поржал.
Так на то ему и 8 лет...
2
ЯНКА / Адказаць
20.02.2019 / 01:43
★ Дарэмна я ўзрадаваўся, падумаўшы, што Хамсу ўзялі ў штат да «рэда» й зьмясьцілі ейны здымак. А гэта аказалася нейкая Мома... ★
Паказаць усе каментары/ 4 /
Каб пакінуць каментар, калі ласка, актывуйце JavaScript у наладах свайго браўзеру