Дзевяць чалавек былі затрыманыя паліцыяй у аўстрыйскай камуне Зефельд-ін-Ціроль і ў Германіі ў рамках справы аб ужыванні і распаўсюдзе допінгу. Сумесную аперацыю праводзілі аўстрыйскае ўпраўленне па барацьбе з арганізаванай злачыннасцю і мюнхенская пракуратура.
У прыватнасці, затрымалі пяцёра спартсменаў: двое з Аўстрыі, адзін з Казахстана, двое з Эстоніі. Акрамя таго, затрыманыя два члены меркаванай злачыннай групоўкі, а таксама спартыўны лекар і яго саўдзельнік з Германіі
Раніцай 27 лютага былі праведзены ператрусы ў размяшчэнні некалькіх зборных каманд і ў Мюнхене.
Аўстрыйская паліцыя адзначае, што гаворка ідзе пра расследаванне дзейнасці «глабальнай допінгавай сеткі».
Расследаванне звязана са сведчаннямі аўстрыйскага лыжніка Ёханэса Дзюра, абвінавачанага ва ўжыванні допінгу ў 2014 годзе.
