Школьнік са Стоўбцаў, які напаў на аднакласнікаў і настаўніцу, цяпер знаходзіцца ў Навінках на псіхолага-псіхіятрычнай экспертызе. Пра гэта, адказваючы на пытанні Tut.by, распавёў кіраўнік СК Іван Наскевіч.
— Следства вызначыла, чаму падлетак напаў на настаўніцу і школьнікаў? Што насамрэч адбылося ў школе ў Стоўбцах?
— Да канца мы яшчэ не можам вызначыць матывацыю яго дзеянняў, я казаў пра тое, што нам удалося выявіць яго дэвайсы, і той аб'ём інфармацыі, які мы адтуль узялі, дазваляе нам выпрацаваць напрамак, у якім далей з ім размаўляць. Прыкладна зразумела ўжо, што ім рухала. Але ў любым выпадку мы зараз разлічваем вельмі на дапамогу судовых медыкаў, псіхіятраў.
— Ён цяпер у Навінках знаходзіцца?
— Так, ён зараз накіраваны на комплексную судовую псіхолага-псіхіятрычную экспертызу, ён там будзе досыць доўгі час — месяц-паўтара, напэўна, з ім там будуць размаўляць судовыя псіхіятры. Мы ім перадалі ўсю наяўную ў нас інфармацыю, мы спадзяёмся, што яны нам дапамогуць у раскрыцці матыву яго дзеянняў.
— Там быў нейкі канфлікт у школе?
— У нас няма аб'ектыўных дадзеных, каб казаць пра тое, што там быў нейкі канфлікт. Калі нешта і было, то вельмі схаванае, і пакуль мы гэта не выявілі. Не магу гарантаваць, што канфлікту не было, але нам пакуль невядома.
— Але вы разумееце, што ім рухала?
— Здагадваемся, скажам так. Але вы павінны падзяліць маю асцярожнасць, любое неабдуманае слова можа выклікаць наступствы. Перад канцом расследавання мы абавязкова апублікуем усё, што ведаем, усё, што выявілі. Задача не толькі зразумець, што адбылося і з-за чаго адбылося, але і апярэдзіць падобныя рэчы, каб яны не паўтараліся надалей.
— Кажуць, што ціхага адзіночку практычна немагчыма выявіць.
— Я з вамі цалкам згодны, але прасцей за ўсё сказаць, што нічога нельга зрабіць. А штосьці рабіць мы павінны, пагадзіцеся.
Нагадаем, раніцай 11 лютага вучань 10-га класа СШ № 2 у Стоўбцах напаў з нажом на настаўніцу і школьнікаў. У выніку загінулі педагог і старшакласнік, а двое вучняў трапілі ў бальніцу.
Чаму ён? Бацька хлопца, якога забілі ў Стоўбцах, падрабязна расказаў пра сына і дзень яго смерці
