Маскоўскія экспэрты зазначаюць, што ў выпадку аншлюсу Расея атрымае тут калі не Чачэнію, дык сама мала Ольстэр. Піша Аляксандар Класкоўскі.

Айчынная прапаганда скрозь цьвердзіць пра інфармацыйную вайну, разьвязаную Захадам. І сарамліва пазьбягае гэтага азначэньня, калі гаворка ідзе пра дзеяньні Масквы. Між тым сёньня расейскія мэдыі спаборнічаюць у доказах, што беларускай незалежнасьці хутка капец. Гэта псыхалягічны ціск ня толькі на афіцыйны Менск, але й на ўсю нашу грамаду.

Абышлі ўвагай беларускія дзяржаўныя СМІ і дзіўнае тэлефанаваньне Пуціна Лукашэнку 4 чэрвеня. Няўжо сапраўды, як цьвердзіць прэсавая служба Крамля, раптам – у нядзелю! – загарэлася абмеркаваць падрыхтоўку да самітаў ЭўрАзЭС і АДКБ? А можа, расейскі кіраўнік наўпрост сказаў тое, што пакрысе «зьлівае» «КоммерсантЪ»? Ва ўсякім разе, ягоны галоўны рэдактар у інтэрвію «БелГазете» без эківокаў і не бяз гонару заявіў: наша крыніца ў Крамлі – гэта Пуцін!

Дарэчы, ёсьць як мінімум адна адрознасьць між іхнім ды нашым аўтарытарызмам. У нас немагчыма ўявіць, каб хвост круціў сабакам. Маскоўскія ж экспэрты ўсур’ёз спрачаюцца пра ступень самастойнасьці тамтэйшага прэзыдэнта. Некаторыя змрочна жартуюць: а таварыша Пуціна, уласна кажучы, ніхто надта й не пытае, ці хочацца яму ісьці на трэці тэрмін!

Галоўнае, што гэта патрэбна сілавому клану, што прысмактаўся да нафтавых і газавых трубаў. Гэтыя людзі, маўляў, наўмысна вядуць справу да халоднае вайны з Захадам. Іначай кажучы, трэба настолькі пасварыць Пуціна з астатнімі сябрамі «вялікай восемкі», каб крамлёўскаму кіраўніку стала да ліхтара, што яны там вякнуць пра ягоны трэці тэрмін.

Або, напрыклад, пра інкарпарацыю Беларусі...

Такім чынам, гэтае пытаньне залежыць ня толькі ад трываласьці абарончых рэдутаў Менску, але і ад барацьбы бульдогаў пад дываном у Маскве.

Цяпер аглядальнікі гадаюць, ці прыедзе Пуцін у Беларусь, як анансавалася, на вялікія манэўры «Шчыт Саюзу – 2006» у апошняй дэкадзе чэрвеня. На думку менскага палітоляга Андрэя Фёдарава, адсутнасьць расейскага лідэра стане прыкметай сур’ёзных рознагалосьсяў зь беларускім калегам. Зрэшты, іранічна дадае Фёдараў, «прысутнасьць ня стане доказам адваротнага, бо дзеля ўлюбёных вайсковых забавак можна вытрываць і не такое».

Дарэчы, у манэўрах маюць удзельнічаць і расейскія «МіГі». А Пуцін, калі памятаеце, прылятаў на баявым самалёце нават у Чачэнію. Уяўляеце гэтым разам шапкі расейскіх газэтаў: «Зьнішчальнік Пуціна над Беларусьсю».

Зрэшты, цьвярозыя маскоўскія экспэрты змрочна зазначаюць, што ў выпадку аншлюсу Расея атрымае тут калі не аналяг Чачэніі, дык аналяг Ольстэру дакладна.