Каля офіса кандыдата ў прэзідэнты Украіны Уладзіміра Зяленскага паліцыя выявіла элементы апаратуры для праслухоўвання.
Так пракаментаваў міністр унутраных спраў Арсен Авакаў знаходку праваахоўнікаў, пра якую паведаміла прэс-служба кіеўскай паліцыі.
«Паліцыя Кіева выявіла пад офісам кандыдата ў прэзідэнты Уладзіміра Зяленскага элементы апаратуры праслухоўвання. Вядзецца расследаванне», — цытуе міністра Дэпартамент камунікацыі МУС Украіны.
Пазней Служба бяспекі Украіны пацвердзіла, што апаратура для праслухоўвання дадзенага будынка была размешчана імі, але праслухоўвалі не Зяленскага, а іншы аб'ект.
Між тым дарадца міністра ўнутраных спраў Украіны ўжо заявіў, што ад справы патыхае ўкраінскім уотэргейтам.
Агулам, як выглядае, у гэтай прэзідэнцкай кампаніі СБУ «грае» на баку дзейнага прэзідэнта Пятра Парашэнкі, а міністр унутраных спраў Арсен Авакаў — на баку ягоных канкурэнтаў.