У эфіры тэлеканала АНТ у праграме «Маркаў. Нічога асабістага» госцяй была прэс-сакратарка кіраўніка дзяржавы Наталля Эйсмант. У эфіры яна ацаніла маштаб асобы і думкі Лукашэнкі.
«Я працую ў Адміністрацыі прэзідэнта. І вы добра ведаеце, што гэта палітычны штаб. Давайце казаць прама: усе, хто працуе ў Адміністрацыі прэзідэнта, абавязаны думаць у адной танальнасці з прэзідэнтам. Іншага не дадзена», — падкрэсліла прэс-сакратарка.
Наталля Эйсмант таксама адзначыла маштаб асобы і маштаб думкі Лукашэнкі.
«Кожны дзень паступаюць такія задачы, такія пытанні, якіх ты учора яшчэ не мог нават уявіць», — сказала яна.
Напрыклад, ідэі арганізаваць навагодні баль у Палацы Незалежнасці або правесці нядаўнюю спартыўную серыю ў хакеі паміж зборнай экстралігі і камандай «Дынама-Мінск» належалі менавіта Аляксандру Лукашэнку.
«Мала хто можа ўявіць, якая колькасць ідэй выходзіць менавіта ад кіраўніка. Наблізіцца да гэтага ўзроўню генеравання ідэй вельмі складана і нават, напэўна, немагчыма. Нам бы якасна іх рэалізоўваць», — дадала Эйсмант.
Каментары