Служба знешняй разведкі Эстоніі прааналізавала расійскія ваенныя вучэнні і прыйшла да высновы, што Масква рыхтуецца да ваеннага канфлікту з НАТА. Справакаваць яго можа «каляровая рэвалюцыя» ў Беларусі.
Адзіная сур'ёзная пагроза рэгіянальнай бяспекі для Эстоніі і іншых краін Балтыі выходзіць ад Расіі, папярэдзіла Служба знешняй разведкі Эстоніі ў сваім новым штогадовым дакладзе «Міжнародная бяспека і Эстонія». Падобную выснову эстонская выведка зрабіла, прааналізаваўшы ваенныя вучэнні Расіі.
Эстонская выведка заўважыла, што ў мінулым годзе Расія працягнула нарошчваць сваю ваенную моц уздоўж сваёй заходняй мяжы.
Пры гэтым, заўважае разведка Эстоніі, агульны парадак расійскіх ваенных вучэнняў і іх сцэнары не мяняліся, нягледзячы на падзеі ў Грузіі, ва Украіне, у Сірыі, а таксама санкцыі і разгортванне сіл НАТА ў Прыбалтыцы і Польшчы.
«Па-другое, як бачаць гэта расійскія ўзброеныя сілы, ваенны канфлікт з НАТА пачнецца з-за «каляровай рэвалюцыі» ў адной з суседніх з Расіяй краін. Сцэнары расійскіх вайсковых вучэнняў адлюстроўваюць страх, уласцівы аўтарытарным рэжымам. — робіць выснову эстонская выведка. — Расійскія лідары асцерагаюцца, што дэмакратычныя змены рэжыму могуць перарасці ў больш шырокую рэгіянальную вайну».
У гэтай сувязі, запэўнівае разведка Эстоніі, яна сочыць за сітуацыяй у Беларусі.
«Наша ацэнка такая, што, калі нешта нечаканае здарыцца з прэзідэнтам Аляксандрам Лукашэнкам асабіста або яго рэжымам, будзе вялікая рызыка хуткіх ваенных дзеянняў з боку Расіі, каб перашкодзіць ператварэнню Беларусі ў дэмакратычную празаходнюю краіну», — папярэджвае эстонская разведка.
Каментары