Беларускі турызм ўжо ніколі не будзе ранейшым. Пра гэта сведчаць навіны, якія спадарожнічаюць падрыхтоўцы міжнароднага вясновага кірмашу турысцкіх паслуг «Адпачынак-2019».
Змены могуць адбыцца ўжо сёлета. І ўдзельнікам рынку давядзецца пастарацца, каб захаваць прывабнасць сваіх прапаноў для патрабавальных кліентаў, а самім кліентам — падрыхтавацца да таго, што за добры сучасны сэрвіс трэба плаціць.
Паводле Белстата, паслугамі турфірм у Беларусі летась скарысталіся больш за 2,2 мільёна чалавек.
За мяжу выехала 850,7 тысячы падарожнікаў, крыху больш за палову з іх выправіліся за межы СНД і Еўрасаюза.
Пяцёрка самых папулярных у нашых турыстаў краін апынулася прадказальнай, хоць акцэнты ў параўнанні з папярэднімі гадамі трохі змяніліся: на першым месцы Егіпет, на другім - Турцыя, на трэцім - Украіна, далей ідуць Балгарыя і Расія.
Здавалася б, змяніць прыхільнасці адпачывальнікаў праблематычна, але, як паказвае паспяховае прасоўванне Грузіі на працягу апошніх некалькіх гадоў, а ўслед за ёй і Албаніі, нічога немагчымага няма.
Да прыкладу, у сезоне-2019 чакаюцца цікавыя прапановы па адпачынку ў Азербайджане, Узбекістане і некаторых іншых краінах постсавецкай прасторы. Прафесіяналы прадказваюць, што ў беларусаў вырасце попыт на варыянты накшталт турэцкага Кіпра, мяркуецца павелічэнне палётнай праграмы ў Італію.
Сітуацыя з раннім браніраваннем пакуль не горшая, чым летась, так што сезон правальным не будзе. А вось напружаным і, магчыма, трохі нервовым - абавязкова стане. Найбольш неспакойныя турысты, напрыклад, даўно цікавяцца, ці не прыпсуе летні адпачынак рашэнне Еўрасаюза пра падаражэнне шэнгенскай візы.
Тыя, хто прывык адпачываць на радзіме, асцерагаюцца, што II Еўрапейскія гульні пазбавяць магчымасці выбраць прымальны па цане варыянт баўлення часу з-за наплыву аматараў спорту.
Сёй-той, дачуўшыся аб будучых зменах у Закон «Аб турызме», зацікавіўся: ці не прывядуць новыя правілы гульні на рынку да істотнага падаражэння паслуг турагенцтваў?
А аматары недарагіх падарожжаў варожаць: ці варта чакаць чарговых адмен тураў з-за банкруцтваў расійскіх аператараў, як гэта было ў мінулыя гады?
Многіх таксама цікавяць прапановы па ўязным і ўнутраным турызме: не сакрэт, што бязвізавы рэжым наведвання краіны праз Нацыянальны аэрапорт Мінск і на захадзе рэспублікі цудоўным чынам паўплывалі на развіццё індустрыі гасціннасці.
Многія, калі не ўсё, нюансы сезона-2019 высветляцца падчас працы 22-га Міжнароднага вясновага кірмашу турысцкіх паслуг «Адпачынак-2019».
Яго ладзяць Нацыянальны выставачны цэнтр «Белэкспа» сумесна з Міністэрствам спорту і турызму.
Арганізатары запрашаюць да ўдзелу ў гэтым форуме ўсе арганізацыі, якім ёсць што сказаць і прапанаваць кліентам і бізнэс-партнёрам. Згоду на ўдзел ужо далі кампаніі з дзевяці краін, спіс працягвае папаўняцца.
Тэматыка галоўнай падзеі вясновага сезона ў айчыннай галіне гасціннасці - падарожжы (сезонны адпачынак, бізнэс-туры, дзіцячы адпачынак, круізы, адукацыйныя туры), медыцынскі турызм, экскурсійныя праграмы, транспартныя паслугі, спартыўны інвентар, страхаванне ў турызме, паслугі санаторыяў, пансіянатаў, дамоў адпачынку, турыстычныя клубы, гасцінічны сэрвіс, тавары для адпачынку і спорту, а таксама карты, буклеты, даведнікі… Праграма кірмашу таксама прадугледжвае прэзентацыі, круглыя сталы, семінары па найбольш актуальных праблемах турыстычнай галіны.
22-і Міжнародны вясновы кірмаш турысцкіх паслуг «Адпачынак-2019» пройдзе ад 3 да 6 красавіка па адрасе: Мінск, пр-т Пераможцаў, 14.
Кантакты арганізатараў:
тэл. / факс: (+ 375 17) 334-11-92;
e-mail: [email protected]
Прыватнае прадпрыемства «Драйв Медыя» УНП 192317694
