Канкрэтная руцінная работа Беларусі і Расіі дасць больш вынікаў, чым публічныя дыскусіі. Пра гэта заявіў журналістам міністр замежных спраў Уладзімір Макей, перадае БелТА.
Уладзімір Макей адзначыў, што падтрымлівае заяву МЗС Расіі адносна завочнай дыскусіі знешнепалітычнага ведамства Беларусі з паслом Расіі Міхаілам Бабічам.
«Мы ўжо казалі нашым сябрам і партнёрам пра тое, што трэба не займацца пустой балбатнёй, як кажуць некаторыя фігуранты, а займацца канкрэтнай руціннай працай», — падкрэсліў ён.
Пры гэтым міністр звярнуў увагу, што не варта выпускаць у публічную прастору тыя ці іншыя спрэчныя пытанні.
«Кожны раз, калі я прыходжу на працу і ўключаю «Россия 24», бачу бягучым радком: Рассельгаснагляд зачыніў чатыры прадпрыемствы ці яшчэ нешта там», — растлумачыў ён.
На думку Уладзіміра Макея, замест таго, каб рабіць гэта публічна, лепш звязвацца напрамую і працаваць над ліквідацыяй тых праблем, якія часам з'яўляюцца ў двухбаковых адносінах.
