25.03.2019 / 16:29

На Аршанскім інструментальным заводзе плацілі завышаныя заробкі. Распачалі крымінальныя справы 2

Кіраўнікам, спецыялістам і служачым ААТ «Аршанскі інструментальны завод» на працягу трох гадоў плацілі завышаны заробак, паведамляе Камітэт дзяржкантролю.

Прадпрыемству нанесены ўрон на суму звыш 265 тысяч рублёў.

У 2015-2017 гадах заработная плата на інструментальным заводзе выплачвалася несвоечасова. Каб утаіць гэты факт, кіраўнікі прадпрыемства, якія працавалі ў тыя гады, уносілі ў справаздачы недакладныя звесткі. Так, у адпаведнасці з заканадаўствам памер зарплаты радавых работнікаў пры яе несвоечасовай выплаце захоўваецца ў ранейшым памеры, а зарплата кiраўнiкоў, спецыялiстаў i служачых пры гэтым павінна разлічвацца, зыходзячы з тарыфнай стаўкi першага разраду, устаноўленай для работнікаў бюджэтнай сферы. Паколькі тарыфная стаўка была значна ніжэйшай за тую, што дзейнічала на прадпрыемстве, гэта выклікала значнае зніжэнне памеру зарплаты кіраўнікоў. Каб гэтага пазбегнуць, кіраўнікі інструментальнага завода давалі незаконныя ўказанні аб выплаце заработнай платы ў завышаных памерах для кіраўнікоў, спецыялістаў і служачых.

Супраць двух былых кіраўнікоў інструментальнага завода распачатыя крымінальныя справы па ч.3 арт.424 (злоўжыванне ўладай або службовымі паўнамоцтвамі) і ч.2 арт.427 (службовы падлог) Крымінальнага кодэкса. Вядзецца расследаванне.

0
Зьмiцер / Адказаць
25.03.2019 / 23:05
Так, пачатак ёсць. Цяпер чарга за крымінальнымі справамі па фактах заніжаных заробкаў.
0
Святлана / Адказаць
26.03.2019 / 10:30
А я ўжо падумала, што рабочым грошыкі дасталіся...
Каб пакінуць каментар, калі ласка, актывуйце JavaScript у наладах свайго браўзеру