Пастанова Міністэрства лясной гаспадаркі Беларусі «Аб зборы дзікарослых ягад» ўступіла ў сілу 29 сакавіка. Дакументам зацверджаная Інструкцыя аб спосабах і прыстасаваннях для збору і нарыхтоўкі дзікарослых ягад у лясным фондзе, паведамілі ў прэс-службе Мінлясгаса.
Згодна Інструкцыі, збіраць ягады дазваляецца ўручную альбо пры дапамозе ручных прыстасаванняў на дазволеных лясных тэрыторыях
Вызначаны патрабаванні да прыстасаванняў для збору, нарыхтоўкі дзікарослых ягад у лясным фондзе, якія не прыносяць шкоды ягаднікам і не прыводзяць да іх знішчэння.
«Прылада для збору дзікарослых ягад складаецца з зуб'я, ёмістасці назапашвальніка, трымальніка (ручкі) і адпавядае наступным патрабаванням: адлегласць паміж зубамі складае не менш за 0,5 см; корпус прыстасавання і зуб'е вырабляюцца з пластмасы, металу, драўніны, гумы або іх камбінацыі; у прыладах адсутнічаюць рэжучыя краі ў зоне зрывання ягад», — гаворыцца ў пункце 7 Інструкцыі.
Патрабаванні да матэрыялаў прылады былі вызначаныя зыходзячы з вопыту іншых краін, а таксама магчымасцяў вытворцаў.
У Інструкцыі таксама прапісана, што пры зборы чарніц і дурніц прыстасаванне варта накіроўваць пад вуглом да верхняй часткі куста, прытрымліваць сцяблінкі вольнай рукой, пазбягаць, каб у прыладу траплялі тоўстыя ніжнія часткі сцяблінак. Пры зборы журавін прыстасаванне неабходна накіроўваць па паверхні моху і сцяблінак журавін.
Акрамя таго, рэкамендуецца весці збор толькі спелых ягад у перыяд іх масавага паспявання ў сухое надвор'е, пасля сходу росы, бо гэта зніжае верагоднасць абрыву лісця.
Пастанова накіравана на павелічэнне аб'ёмаў нарыхтоўкі дзікарослых ягад у нашай краіне, эфектыўнае выкарыстанне лясной прадукцыі.
«Звяртаем увагу грамадзян на тое, што збор ягад па новых правілах можна будзе ажыццяўляць ужо з гэтага сезону. Тэрміны збору дзікарослых ягад традыцыйна вызначаюцца абласнымі выканаўчымі камітэтамі з улікам мясцовых умоў», — папярэдзілі ў Мінлясгасе.