Калядная акцыя НН: з дарункамі — у купалаўскую школу. Летась было 83 вучні, сёлета засталося 63 вучні ў Бяларучах Лагойскага раёну.
1. Ноч музеяў па‑бяларуцку
Ад’яжджаем якіх 15 кіламетраў ад мінскай кальцавой у лагойскім кірунку і трапляем у школу сяла Бяларучы, дзе колісь вучыўся самы знакаміты рэдактар «Нашай Нівы», Янка Купала. Мы выправіліся туды не толькі натхніцца купалаўскімі мясцінамі, але прывесці дарункаў школьнікам і настаўнікам, пажыву для сэрца і цела: беларускія кніжкі і, вядома, цукеркі.
Школа сустракае нас адсутнасцю электрычнасці. Высвятляецца, што яе няма па ўсім раёне. Праз якіх пяць хвілінаў успыхвае кабінетная лямпачка. «Вой, прывезлі з сабой святло», — усміхаючыся, кажа дырэктарка Валянціна Петракоўская. Нам прыемна, і мы нешта такое дарэчнае, хваласпеўнае пра сябе, кажам, але праз каторы час лямпачка зноў тухне.
У сутонні дырэктарскага кабінету слухаем пра школьныя штодзённыя. Пра тое, як школа пакрысе агойтваецца пасля жахлівай смерці яе вучаніцы, Ірыны Кужэльнай,
пра амаль стопрацэнтнае паступлення вучняў у ВНУ.
З ліхтарыкамі наведваем музей, што месціцца ў адным з унутраных кабінетаў школы. Голасна пагаджаемся, што такога мы ў сталіцы яшчэ не бачылі. Рупліва сабраныя экспанаты, неасветленыя, яны адно дадаюць праўдападобнасці, нібыта мы насамрэч увайшлі ў пакой старой вясковай хаты. Дрыготкае святло ліхтарыкаў выхоплівае першыя беларускія кнігі, «Лемантар», «Беларускую чытанку». Партрэт вучня бяларуцкага народнага вучылішча, Янкі Купалы. Паэт тут год вучыўся і жыў непадалёк, у вёсцы. У цямрэчы дзіўнымі зломамі паўстаюць традыцыйныя сельскія прылады. Дарэчы, ад дырэктаркі музею Таісіі Каранды даведваемся, што такое капыл. Па‑сучаснаму, калодкі для абутку.
2. Хай будзе святло!
Галоўны вораг купалаўскай школы — дэмаграфія. У выніку дэмаграфічнага крызісу і блізіні мегаполісу вучняў у бяларуцкай школе істотна паменела. Летась было 83 вучні, дык сёлета засталося 63. Школа яшчэ пару гадоў таму была сярэдняя, цяпер — толькі базавая (9 класаў) і ёй пагражае перайсці ў незайздросны шэраг «малакамплектных». «А як будзе 20 вучнях, то школу зачыняць увогуле», — бядуе настаўнік Мікола Ляшчун.
Але педагогі спадзяюцца, што Купала, як бы апякун школы, не пакіне іх.
Бо галоўнае, каб школа была: і для тутэйшых дзетак — каб ім не давялося ездзіць па навуку ў далёкія палесціны, і для беларушчыны — бо тут, здаецца, купалаўскі дух: дзеці пачынаюць пісаць вершы і апавяданні. І — чаго тут хаваць — для саміх настаўнікаў так трэба. Бо як закрыюць школу, то дзе працаваць настаўніку? У дадатак педагогі ж прыежджыя: вось сам спадар Мікола прыехаў з Палесся, ёсць вучыцелька з Брэсту — настаўнікі тут маюць дамы ў навакольных вёсках, тут прайшло іх жыццё, і, пэўна, вяртацца назад няма як. «20 гадоў у гэтым музеі. Вось што я буду без яго рабіць — гэта ж маё жыццё!» — кажа спадарыня Таісія.
У канцы візіту, пасля ўрачыстага ўручэння калядных дарункаў, здымаем на відэа школьную перамену. Няўрымслівыя лётанні, смех, — усё як зазвычай. Электрычнасць у раёне ніяк не наладзяць, але прасветлыя калідоры бяларуцкай школы не патрабуюць дадатковага святла — на дварэ пакуль што поўдзень кароткага зімовага дня.
Павал Касцюкевіч, Яраслаў Сцешык і Раман Маладзяшын
Фота Яраслава Сцешыка
настаўнік Мікола Ляшчун, дырэктарка школы Валянціна Петракоўская і загадчыца музею Таісія Каранда
Мікола Ляшчун
Жыве ў Бяларучах Купала
Жыве ў Бяларучах Купала,
Душа Купалы будзіць нас.
Нязгаснай зоркаю заззяла,
Каб веры промень не пагас.
Тут Беларусь, як веру, вызнаў
І далучыўся да пяра,
Тут хвоі ля пясчаных выспаў
Люлялі мроі песьняра.
У бліках залатога сонца
Прачулых мараў спеў пагляд,
Каб воля глянула ў ваконца
І заквітнеў наш край, як сад.
Каб мову матчыну ад Бога,
Як памяць продкаў бераглі,
Ды безнадзейную аблогу
На роднай здолелі зямлі.
Імя Купалы ведаць мала -
Не забывайма кліч яго.
Жыве ў Бяларучах Купала,
Нібыта дух святых багоў.