Алексіевіч пра Курапаты: «Гэта злачынства. Яны там паставілі кавалак казённага каменю і думаюць, што ля яго будуць плакаць людзі»
Нобелеўскі лаўрэат па літаратуры Святлана Алексіевіч пракаментавала для «Нашай Нівы» сітуацыю, якая склалася ў Курапатах, дзе дэмантуюць і вывозяць крыжы.
«Ясна адно, што дзяржава наступае на народную ініцыятыву. Дзяржава хоча ўзяць усё пад свой кантроль, не разумеючы, што ўсё ўзяць пад кантроль немагчыма. Гэтыя крыжы ўсё адно застануцца ў памяці, у нашай свядомасці.
Гэта наступ, наступ на ўсю грамадзянскую ініцыятыву. Я думаю, што Курапаты былі сімвалам народнай самастойнасці, народнай памяці. І дзяржава не хоча з гэтым мірыцца, асабліва перад выбарамі. Таму ідзе такая зачыстка. Гэта ўсё формы свабоды, а дзяржава не хоча мірыцца ні з якой свабодай.
Што казаць, калі міністр унутраных спраў [Ігар Шуневіч — «НН»] надзявае касцюм генерала НКВД і ідзе на нейкае святкаванне. І калі Лукашэнка выступаў, то сказаў міністру: «Вам няма чаго саромецца». Дзяржава не хоча мірыцца, прызнаваць рэпрэсіі. Дзяржава хоча пакінуць мінулае ў разуменні тых сталінскіх часоў.
Ні пра якое пакаянне пакуль гаварыць нельга. Яны думаюць, што паставяць помнік свой і такім чынам выкупяць свае грахі, кроў, смерці. Не, гэтым яны не выкупяць. Гэтым яны зробяць толькі тое, што больш сур’ёзным будзе да іх рахунак у будучыні. А ён абавязкова будзе.
Курапаты — унікальны народны помнік. Сам народ знайшоў яму форму, сам народ ваяваў за яго, адваяваў яго. Нічога падобнага, колькі б я ні ездзіла па свеце, я не бачыла. І яны думаюць, што паставяць кавалак гэтага казённага камяню і людзі пойдуць туды плакаць? Не, гэтага не будзе ніколі. І нават таму гэта злачынства».
Цяпер чытаюць
Кіраўніка маркетынгавай кампаніі прысудзілі да 7,5 года за сацыялагічнае даследаванне пра кавід у Беларусі — «здрада дзяржаве»4
Кіраўніка маркетынгавай кампаніі прысудзілі да 7,5 года за сацыялагічнае даследаванне пра кавід у Беларусі — «здрада дзяржаве»
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3434
Каментары