Міністэрства лясной гаспадаркі размясціла ў сябе на сайце афіцыйны каментар наконт падзей у Курапатах, дзе работнікі Бараўлянскага лясгаса дэмантавалі крыжы, усталяваныя грамадскасцю ў памяць пра ахвяр масавага тэрору на гэтай тэрыторыі.
Міністэрства паведамляе, што «Бараўлянскі спецлясгас» праводзіў «планавыя работы па добраўпарадкаванні ляснога фонду».
«У прыватнасці, спецыялістамі лесагаспадарчай установы быў ажыццёўлены знос незаконных аб'ектаў і ўстаноўлена агароджа па мяжы ахоўнай зоны», — паведамілі ў міністэрстве.
У каментары паведамляецца, што гэтыя работы праводзіліся ў адпаведнасці з п.10 Праекта зоны аховы гісторыка-культурнай каштоўнасці «Месца гібелі ахвяр палітычных рэпрэсій (1930-1940 гады) ва ўрочышчы Курапаты (Мінскі раён)», а таксама на падставе пастановы Савета Міністраў Рэспублікі Беларусь ад 17 верасня 2018 г. № 675 «Аб зацвярджэнні Правілаў добраўпарадкавання мемарыялаў і помнікаў воінскай славы, адзіночных і брацкіх магіл воінаў, якія загінулі ў гады Першай сусветнай і Вялікай Айчыннай войнаў, воінскіх могілак, асобных воінскіх участкаў агульных могілак, месцаў масавага пахавання грамадзянскага насельніцтва» і Кодэкса Рэспублікі Беларусь аб культуры.
Міністэрства адзначае, што падчас устаноўкі агароджы «Бараўлянскі спецлясгас» ажыццявіў таксама знос «незаконна ўстаноўленых аб'ектаў» — крыжоў.
«Гэтыя збудаванні не адлюстраваны ў існуючым пашпарце аб'екта і не маюць ніякага дачынення да ўшанавання памяці ахвяраў сталінскага тэрору», — піша ў каментары Мінлясгас.
У якасці пацверджання сваіх слоў міністэрства прыводзіць артыкул Ігара Марзалюка «Рэаліі і міфы аб БССР: у БССР у гады рэпрэсій загінулі мільёны», апублікаванай у газеце «Советская Белоруссия».
«Такім чынам, заявы асобных актывістаў пра «абразу памяці» і г.д. фактычна не маюць пад сабой гістарычнай асновы і, па сутнасці, наўмысна ўводзяць грамадскасць у зман.
Варта таксама падкрэсліць, што ўсе крыжы, устаноўленыя на тэрыторыі ўрочышча законным чынам, пры правядзенні работ па добраўпарадкаванні былі захаваныя. На тэрыторыі комплексу можна знайсці, у тым ліку, і адны з самых першых крыжоў, што кажа пра трапяткое стаўленне дзяржавы да захавання памяці», — адзначае міністэрства.
Каментары