@franckriester
Tut.by папрасіў Віталя Навіцкага, афіцыйнага прадстаўніка МНС Беларусі, распавесці пра нюансы працы на такіх маштабных здарэннях.
— Заўсёды ў прыярытэце — выратаванне чалавечых жыццяў, а ўжо ў другую чаргу — любыя матэрыяльныя каштоўнасці, — распавядае Віталь Навіцкі. — Дарэчы, у некаторых выратавальных службаў у свеце выратаванне матэрыяльных каштоўнасцяў увогуле не ўваходзіць у задачы. Адпаведна, калі на аб'екце няма людзей, няма і рашэння рызыкаваць жыццём і здароўем пажарных дзеля выратавання матэрыяльных каштоўнасцей. Што тычыцца тушэння Нотр-Дама, вядома, можна было б задзейнічаць верталёт Мі-8 ці Мі-26, калі б яны былі ў іх на ўзбраенні — і ён адназначна дапамог бы. Гэтыя верталёты могуць «завісаць» над пажарам і кропкава скідаць ваду ў зададзеную кропку.
— Калі гарыць гісторыка-культурная каштоўнасць, ці ёсць у ратавальнікаў план, як працаваць у такой сітуацыі? Напрыклад, галоўнае — выратаваць цэнтральную частку, а шпіль і дах можна потым будзе аднавіць.
— Адказ заўсёды адзін: галоўнае — выратаванне чалавечых жыццяў. Падчас ліквідацыі пажару ёсць два этапы: лакалізацыя і ліквідацыя. Лакалізацыя — гэта зрабіць так, каб агонь далей не распаўсюджваўся і ня наносіў дадатковай шкоды. Тут няма розніцы, што ратаваць — выбіраюцца вырашальныя напрамкі ў залежнасці ад таго, у які бок развіваецца пажар. Адпаведна, туды трэба падаваць сілы і сродкі, каб прадухіліць яго развіццё. А ўжо затым наступае іншая стадыя — канчаткова ліквідаваць пажар, - адказвае Віталь Навіцкі.
