Літва не можа супрацоўнічаць з Беларуссю з-за будаўніцтва атамнай электрастанцыі ў Астраўцы, паколькі так яна прызнала б законнасць гэтай небяспечнай электрастанцыі і страціла б магчымасць патрабаваць яе закрыцця, сказала прэзідэнт Літвы Даля Грыбаўскайце, піша Delfi.
«Любая згода на ўдзел і стварэнне сумесных інстытутаў будзе азначаць легітымацыю Астравецкай АЭС. Гэта азначала б, што мы звязваем свае рукі, і мы не зможам патрабаваць, каб Беларусь закрыла гэтую электрастанцыю», — сказала Грыбаўскайце журналістам у аўторак.
Гэта, па яе словах, адносіцца і да прапановы Беларусі дамовіцца аб стварэнні сумеснай сістэмы маніторынгу Астравецкай АЭС. Такую прапанову станоўча ацаніў прэм'ер-міністр Саўлюс Сквярняліс.
Грыбаўскайце падкрэсліла, што забяспечыць бяспеку Астравецкай АЭС немагчыма. «Згодна з рашэннем Эспаа, праблема не ў бяспецы электрастанцыі, а ў тым, што абраная пляцоўка небяспечная. Гэта азначае, што гэтая электрастанцыя наогул не можа функцыянаваць і такой павінна быць палітычная мэта Літвы», — сказала прэзідэнт Літвы.
