Журналіст Андрэй Пачобут апублікаваў у фэйсбуку фотаздымкі з візіта дзяржаўнага сакратара польскай канцалярыі Адама Квяткоўскага ў Ліду.
Там на сустрэчу з чыноўнікам вывелі вучняў польскамоўнай школы, у рукі ім далі польскія сцяжкі. За спінамі — вялізны польскі сцяг.
«Наша Ніва» удакладніла ў старшыні Саюза палякаў Беларусі Анжалікі Борыс, грамадзянамі якой краіны з'яўляюцца гэтыя дзеці.
«Гэта грамадзяне Беларусі», — адказала яна.
Борыс перакананая, што нічога заганнага ў такой практыцы няма.
«Мы — Саюз палякаў. А гэта — прэзідэнцкі міністр. Мы заўсёды вывешваем сцяг, гэта міжнародная практыка пры такіх візітах. Польскі міністр быў у Лідзе з візітам у польскую школу, быў таксама ў Гродне. Там мы арганізоўвалі мерапрыемства да 2 мая — Дня сцяга, Дня Канстытуцыі. І там таксама вывешвалі сцяг. І будзем вывешваць, пакуль будзем жыць. А беларусы хай вывешваюць свой бела-чырвона-белы сцяг, я не супраць», — патлумачыла яна.
