13.05.2019 / 13:45

Беларусы вырабілі першае ў свеце валошкавае марозіва з жытам і льном 7

Беларусы вырабілі дэсерт, які дагэтуль не выпускалі сусветныя вытворцы. Марозіва «Белы полюс» з пялёсткамі валошак і насеннем лёну ў жытнёвым кубачку мінчукі змогуць пакаштаваць з 13 мая. Першы пункт продажаў — крама Symbal.by на праспекце Машэрава, 18 у Мінску. Цана 90-грамовай порцыі з першай партыі — 1 рубель 50 капеек.

Беларускі трэнд на валошкі задаў стагоддзе таму паэт Максім Багдановіч, а цяпер гэтыя кветкі з'яўляюцца на самалётах, шыльдах рэстаранаў і нават у марозіве. Нацыянальны дэсерт з «кветак радзімы» вырабіла найстарэйшая ў Беларусі фабрыка марозіва «Белы полюс». Валошка — не адзіная беларуская фішка: пламбір змяшчае насенне лёну, а кубачак — жытнёвую муку. Задумка вытворцаў — стварыць прадукт, пакаштаваўшы які, турыст у літаральным сэнсе адчуе Беларусь на смак.

«Мы даўно заўважылі, што простае пытанне турыста «што незвычайнае можна пакаштаваць у Беларусі?» ставіць у тупік нашых людзей, якія адразу прыгадваюць толькі дранікі. Спадзяёмся, што валошкавы пламбір вырашыць праблему: гэта на самай справе смачнае марозіва і ўнікальны прадукт, якога няма ні ў адной краіне свету, апроч Беларусі. Смак яго наўрад ці зблытаеш з іншым дэсертам. Малочная аснова марозіва дапаўняецца кветкава-травяным водарам, а калі здараецца раскусіць зерне лёну, адчуваецца салодкі мядова-масляны прысмак», — каментуе намеснік дырэктара па маркетынгу «Белага полюса» Максім Журовіч.

«Белы полюс — марозіва пламбір у вафлевым кубачку…» — так кампанія апісвае новае марозіва на яго ўпакоўцы. Брэнд прасоўвае беларускую мову і культурныя сімвалы. Таму лагічна, што першым пунктам, дзе з'явіцца валошкавае марозіва, стане крама нацыянальнай атрыбутыкі Symbal.by. Там новы прадукт будзе прадавацца з 13 мая і да халоднай восені. З сярэдзіны мая валошкавы пламбір стануць паступова завозіць у супермаркеты сталіцы ды іншых беларускіх гарадоў. Экспартаваць дэсерт за межы краіны вытворцы адмовіліся прынцыпова, каб пакінуць разынку (дакладней валошку) «толькі ў Беларусі і нідзе болей».

1
фелікс / Адказаць
13.05.2019 / 13:30
Зерне - натуральна добра. Але вяршкі ці раслінны тлушч ?
1
VVV / Адказаць
13.05.2019 / 13:38
Малайцы, Белы полюс!
1
Лістападаўскі Ґаспадар / Адказаць
13.05.2019 / 14:14
Цяпер сапраўды можна пакаштаваць Беларусь.
Паказаць усе каментары/ 7 /
Каб пакінуць каментар, калі ласка, актывуйце JavaScript у наладах свайго браўзеру