Уначы з суботы на нядзелю ў Маскве прэм’еры Пуцін і Цімашэнка дасягнулі газавага пагаднення. На даволі выгадных для Ўкраіны ўмовах.
Стаяла ўжо глыбокая ноч, калі прэм’ер‑міністры Расіі і Ўкраіны абвесцілі пра выпрацоўку пагаднення, якое ўрэгулюе газавы канфлікт, у выніку якога паў‑Еўропы засталося без паліва.
Уладзімір Пуцін заявіў, што Ўкраіна ў наступным годзе будзе плаціць за газ еўрапейскую цану мінус 20%‑ная скідка. Гэта азначае істотны рост цэнаў для Ўкраіны ў першым квартале гэтага году, але значнае падзенне — у другім квартале.
Цана на газ вылічваецца ў залежнасці ад цаны на нафту паўгадавой даўніны. Паколькі цана на нафту ўпала пры канцы лета мінулага году ўтрая, то і цана на газ з другога кварталу пакоціцца ўніз.
Юлія Цімашэнка запэўніла, што Ўкраіна адновіць транзіт газу, як толькі «Газпром» і «Нафтагаз» падпішуць адпаведнае пагадненне. Чакаецца, што тое здарыцца 19 студзеня. Абедзве кампаніі — дзяржаўныя.
Пуцін і Цімашэнка дасягнулі ўгоды пасля суботняй канферэнцыі па пытаннях транзіту газу, што прайшла ў Маскве з удзелам прадстаўнікоў шэрагу еўрапейскіх краінаў, у тым ліку Беларусі.
У 2008 годзе Ўкраіна плаціла $179,50 за 1000 кубаметраў газу. Еўрапейская цана на першы квартал 2009 году складае прыкладна $450.
Да зрыву перамоваў 31 снежня Расія прапаноўвала Ўкраіне плаціць $250 праз увесь 2009 год. Украіна з ёю не пагаджалася. «Нафтагаз» быў гатовы на $235. Дык хто выйграў у выніку канфлікту?
Эксперты лічаць, што сярэдняя цана на газ у 2009 годзе складзе 260‑300 даляраў. Такім чынам, сярэднегадавая цана для Ўкраіны будзе роўнай 208‑240 далярам. Пртым Украіна частку першага кварталу карысталася ўласнымі запасамі газу, што дазволіць знізіць аб’ём экспарту па высокай цане.
Праўда, расцэнкі на транзіт застануцца ў 2009‑м на ранейшым узроўні, як і прадугледжваўся дамовай ад 2006 году.
Ад 2010 году краіны маюць перайсці на еўрапейскія цэны на газ і транзіт — па цане Славаччыны за вылікам кошту транзіту праз Украіну. Фактычна, бакі па выніках вайны засталіся на ранейшых пазіцыях. Расіі не ўдалося навязаць Кіеву свае ўмовы гульні.
Пераход Украіны на аплату за газ па рынкавых цэнах паскорыць аналагічны пераход Беларусі. Цана для нашай краіны за газ на гэты год, дарэчы, дагэтуль не абвяшчалася. Па ідэі, яна павінна быць ніжэйшай за ўкраінскую. «Газпром» дае Беларусі скідку, бо наша краіна, у адрозненне ад Украіны, саступіла яму права ўласнасці на газаразмеркавальныя сеткі — ААТ «Белтрансгаз».
