Следчы камітэт паведамляе, што за мінулыя суткі следчымі, супрацоўнікамі міліцыі і экспертамі праведзены каласальны аб'ём працы, каб высветліць усе абставіны гібелі супрацоўніка ДАІ ў Магілёўскім раёне.
Згодна з папярэднім заключэннем экспертаў, смерць міліцыянера наступіла ў выніку агнястрэльнага ранення ў галаву. Пры гэтым следчыя чакаюць заключэння судова-медыцынскай і іншых экспертыз.
Следчыя цяпер разглядаюць некалькі версій здарэння, у тым ліку правяраецца версія аб выкраданні міліцыянера невядомымі асобамі на аўтамабілі чорнага колеру, аднак, зыходзячы з атрыманых у ходзе расследавання звестак, яна не з'яўляецца прыярытэтнай.
Пры гэтым следствам атрымана інфармацыя, што каля 18-й гадзіны 16 мая супрацоўнік міліцыі знаходзіўся каля чыгуначнага пераезду ў раёне вуліц Вакзальнай і Першамайскай Магілёва насупраць будынка Аблспажыўсаюза, дзе сеў у нявысветлены аўтамабіль. Праз некаторы час маладога чалавека знайшлі памерлым.
Паведамляецца, што па справе затрыманых няма.
Чытайце таксама: У Магілёве невядомыя на расійскіх нумарах выкралі і забілі 22-гадовага інспектара ДАІ
