Сэкс паміж зямлянамі і дзецьмі каланізатараў Марса можа быць небяспечным, піша Inverse.
Выданне прыводзіць меркаванне прафесара Універсітэта Райса (штат Тэхас, ЗША) Скота Саламона, які ўпэўнены, што біялагічная эвалюцыя чалавека на Чырвонай планеце будзе працякаць з хуткасцю «амерыканскіх горак».
Як мяркуе біёлаг, нашчадкаў каланізатараў Марса ад людзей з Зямлі будуць адрозніваць больш моцныя косткі, абмежаваная магчымасць глядзець удалячынь, зменены колер скуры, лепшая засваяльнасць кіслароду і іншая імунная сістэма.
Гэта можа зрабіць небяспечным кантакты паміж зямлянамі і марсіянамі, што накладзе штучнае абмежаванне на тое, як дзве папуляцыі змогуць узаемадзейнічаць і змешвацца. Саламон сцвярджае, што ў сярэднім кожнае дзіця на Зямлі нараджаецца з 20-120 генетычнымі мутацыямі, колькасць якіх з-за падвышанай радыяцыі на Марсе будзе значна вышэйшай.
