Львоўская абласная рада нагадала прэзідэнту Украіны Уладзіміру Зяленскаму пра яго абавязак выкарыстоўваць украінскую мову падчас публічных выступаў. Адпаведны зварот аб недапушчэнні ігнаравання статусу дзяржаўнай мовы быў прыняты на пасяджэнні ў аўторак, 28 мая.

У дакуменце адзначаецца, што палажэнні Канстытуцыі Украіны абавязваюць ужываць дзяржаўную ўкраінскую мову як мову афіцыйных зносін — падчас публічных выступаў, у каментарах і інтэрв'ю.

«Мы, дэпутаты Львоўскай абласной рады, лічым, што прэзідэнт дзяржавы, якая ваюе, абавязаны цалкам выключыць рускую мову з уласнага ўжывання ў публічных сферах грамадскага жыцця, як афіцыйную мову Расіі — дзяржавы-агрэсара», — гаворыцца ў звароце.

«Улічваючы відавочнае парушэнне ўстаноўленых заканадаўчых нормаў, просім вас, прэзідэнта Украіны, не дапускаць гэтага ў далейшым і ў сваёй публічнай дзейнасці карыстацца дзяржаўнай украінскай мовай», — дадалі львоўскія дэпутаты.