Фота абласной міліцыі

Падзяку ад віцебскай міліцыі ўручыў сёння выпускніку сярэдняй школы №8 Яўгену Гайко кіраўнік ведамства Міхаіл Грыб. Каб выканаць прыемную місію, ён наведаў урачыстую лінейку, прысвечаную апошняму званку, паведамляе прэс-служба абласной міліцыі.

Тыдзень таму па дарозе ў школу Яўген стаў сведкам дзёрзкага злачынства. На маладую жанчыну напаў рабаўнік і паспрабаваў адабраць у яе сумку. Юнак, пачуўшы крык аб дапамозе, адразу ж падбег і пастараўся даць адпор злачынцу. Той, сустрэўшы актыўны супраціў, паспяшаўся збегчы.

Спалоханая жанчына выклікала міліцыю. Яўген, добра запомніўшы прыкметы злачынцы, сеў у службовы аўтамабіль з супрацоўнікамі крымінальнага вышуку. Аб'язджаючы вуліцы і двары, ён заўважыў падобнага мужчыну на прыпынку грамадскага транспарту. Так падазраваны ў здзяйсненні рабавання быў затрыманы. Ім аказаўся раней судзімы 38-гадовы талачынец.