14.06.2019 / 18:41

WSJ: Беларусь прыходзіць з холаду дапоўнена 35

Выданне ілюструе свой артыкул такім здымкам ТАСС.

«Беларусь прыходзіць з холаду, калі спрабуе аддаліцца ад Расіі» — пад такім загалоўкам апублікавала артыкул пра нашу краіну амерыканская газета The Wall Street Journal.

Гэта алюзія да назвы знакамітага дэтэктыва Джона Ле Карэ «Шпіён, які прыйшоў з холаду». Англійскі выраз «прыйсці з холаду» азначае апынуцца ў новым для сябе, раней недаступным, немагчымым становішчы.

«Прэзідэнта Аляксандра Лукашэнку некалі называлі апошнім дыктатарам Еўропы. Ён 25-ы год кіруе краінай жалезным кулаком, але перастаў быць аб'ектам астракізму [на Захадзе]», — піша The Wall Street Journal.

Газета адзначае, што ад 2014 года, калі здарыўся Крым і Данбас, Аляксандр Лукашэнка спрабуе аслабіць залежнасць ад Расіі, і гэтыя спробы былі заўважаныя як за межамі, так і ўнутры краіны.

Журналіст звяртае ўвагу, што «Беларусь нядаўна прымусіла з'ехаць расійскага пасла, абвінаваціўшы яго, што ён ставіцца да краіны як да правінцыі Расіі. Праз некалькі дзён пасля гэтага былі арыштаваныя намеснік кіраўніка Рады бяспекі і дырэктар «Белтэлекама» — абодва па абвінавачванні ў атрыманні грошай ад расійскіх суб'ектаў», — піша выданне.

«Незалежнасць і суверэнітэт — святыя для Беларусі і немагчыма, каб нехта ў Беларусі захацеў здаць іх», — цытуе выданне міністра замежных спраў Уладзіміра Макея.

Макей дадае, што з моманту развалу СССР у 1991 годзе, цэлыя пакаленні «нарадзіліся ў незалежнай дзяржаве і яны хочуць жыць у незалежнай дзяржаве».

Каментуючы паляпшэнне адносін Беларусі з ЗША ў апошнія гады, Макей адзначыў, што змянілася геапалітычная сітуацыя, у рэгіёне з'явіліся новыя канфлікты, і «ЗША ўбачылі, што Беларусь — не прыдатак нейкай іншай краіны».

Выданне адзначае, што пры гэтым міністр заклікаў не перабольшваць рознагалоссі Мінска і Масквы.

У той жа час «Уол-стрыт джорнал» цытуе незалежную дэпутатку Палаты прадстаўнікоў Ганну Канапацкую: «Давайце будзем сумленныя: Беларусь на сёння не ёсць незалежнай, прынамсі, эканамічна. Нічога немагчыма зрабіць без дыверсіфікацыі і пераарыентацыі гандлю, а гэтага не дасягнуць без рэформаў, а рэформаў няма».

«Мы вельмі моцна залежым ад Расіі, — кажа Кацярына Барнукова, дырэктарка беларускага даследчыцкага цэнтра BEROC. — Пытанне не ў тым, ці павінна адбыцца дыверсіфікацыя, а ў тым, ці гэта магчыма».

Сяргей Гезгала

15
Непрыхвасьцень / Адказаць
14.06.2019 / 16:19
не верю (с) станиславский
2
LitvinM / Адказаць
14.06.2019 / 16:33
Галоўнае каб на справе было так, а не ў інтервью
6
Літовец / Адказаць
14.06.2019 / 16:33
Навошта тады інтыгравацца?

Ці гэта РФ усё ніяк не інтэгруююца ў склад Беларусі ?
Калі так дык дзе рэзультат, чаму Лукашэнка яшчэ не ў Крымлю?
Паказаць усе каментары/ 35 /
Каб пакінуць каментар, калі ласка, актывуйце JavaScript у наладах свайго браўзеру